I akuzuari H.P është shpallur fajtor dhe është dënuar me dënim unik me burgim në kohëzgjatje prej 4 (katër) vite e 6 (gjashtë) muaj si dhe dënimin unik me gjobë në lartësi prej 42.000 (dyzet e dy mijë ) euro të cilën shumë i akuzuari është i obliguar që ta paguajë në afat prej 15 ditësh nga dita e plotfuqishmërisë së këtij aktgjykimi.
Gjykata Themelore në Prishtinë ka shpallur aktgjykimin kundër të akuzuarit H.P, për veprën penale ‘Ushtrimi i kundërligjshëm i veprimtarisë mjekësore ose farmaceutike në vazhdimësi’.
RTK merr vesh se i dënuari është Hysri Peqani, me vendbanim në Prizren, i cili njihet edhe si mjek popullor me emrin ‘Burdushi’.
Koha e kaluar nën masën e paraburgimit i llogaritet në dënimin e shqiptuar me burgim.
Të njëjtit i konfiskohen armët, një pistoletë e tipit ‘’Girsan’’ të kalibrit 9mm, me dy karikatorë si dhe 166 fishekë të të njëjtit kalibër, si dhe një pushkë gjuetie të tipit ‘’Super Campion’’ si dhe 55 fishekë.
Gjithashtu, me aktvendim, gjykata ia konfiskoi edhe pasurinë e luajtshme dhe e paluajtshme e përfituara me veprën penale “Ushtrimi i kundërligjshëm i veprimtarisë mjekësore ose farmaceutike në vazhdimësi” në vlerë të përgjithshme më shumë se 2.5 milionë euro.
Palët e dëmtuara lidhur me kërkesën pasurore juridike udhëzohet në kontestin e rregullt civil.
Kundër këtij aktgjykimi, palët kanë të drejtë ankese në Gjykatën e Apelit të Kosovës, përmes Gjykatës Themelore në Prishtinë.
