Presidenti i FIFA-s, Gianni Infantino, sipas kryetarit të Federatës së Futbollit të Kosovës, Agim Ademi, ka lavdëruar institucionet që e kanë vendosur si prioritet përmirësimin e infrastrukturës së futbollit.
Ademi bashkë me Ministër i Kulturës, Rinisë dhe Sportit. Hajrulla Çekun, kanë takuar të enjten të parin e FIFA-s.
“Edhe FIFA konfirmon përkrahjen për futbollin kosovar. Jam i nderuar për pritjen tejet të përzemërt të presidentit të FIFA-s, Gianni Infantino në Shtëpinë e Futbollit në Cyrih, ku së bashku me ministrin Hajrulla Çeku prezantuam planin investiv 5-vjeçar të MKRS-së për përmirësimin e infrastrukturës së stadiumeve të futbollit, projekt në të cilin do të jenë të përfshira edhe FFK dhe Komunat. Edhe në këtë takim diskutimet ishin tejet përmbajtësore dhe janë shpresëdhënëse se në të ardhmen futbolli i Kosovës do të jetë në një nivel tjetër në aspektin e infrastrukturës. Presidenti Infantino u shpreh i lumtur që Qeveria dhe Komunat janë afër FFK-së në realizimin e projekteve që kanë synim përmirësimin e infrastrukturës së futbollit. Infantino lavdëroi institucionet tona që e kanë vendosur si prioritet përmirësimin e infrastrukturës së futbollit, pasi siç tha rinia dhe talentet e shumta në Kosovë meritojnë që t’u krijohen kushte më të mira. Ai na uroi një nismë sa më të mbarë të ciklit të ardhshëm kualifikues dhe shprehu besimin e tij për sukses të Kosovës. Presidenti Infantino edhe një herë më përgëzoi për punën e deritashme dhe theksoi se dera e FIFA-s për ne do të jetë gjithmonë e hapur, pasi siç tha Kosova zë vend të veçantë në zemrën e tij. Nga ana ime i shpreha mirënjohjen më të thellë për mbështetjen që i jep futbollit të Kosovës dhe për gatishmërinë e tij për të qenë afër FFK-së në çdo projekt”, ka shkruar Ademi.
Ademi dhe Çeku gjatë ditës së djeshme kanë takuar edhe drejtues të UEFA-s.
