Rusia do të nisë një luftë bërthamore nëse mposhtet gjatë luftës në Ukrainë, tha Dmitry Medvedev, nënkryetar i Këshillit të Sigurimit të Federatës Ruse.
Kështu zyrtari reagoi ndaj deklaratave të liderëve perëndimorë se Rusia duhet të humbasë luftën kundër Ukrainës për të siguruar paqen afatgjatë. “Dhe askujt nga të varfërit nuk i shkon mendja të nxjerrë përfundimin elementar vijues nga kjo: humbja e një fuqie bërthamore në një luftë konvencionale mund të provokojë shpërthimin e një lufte bërthamore. Fuqitë bërthamore nuk kanë humbur konfliktet e mëdha nga të cilat varet fati i tyre”, shkroi Medvedev në kanalin e tij Telegram.
Ai gjithashtu vuri në dukje se aleatët e Ukrainës do të takohen më 20 janar në bazën gjermane Ramstein, ku do të diskutojnë taktika dhe strategji të reja kundër Rusisë, si dhe do të njoftojnë furnizimin me armë të reja të rënda dhe sisteme sulmi. Në veçanti, Kievi mund të marrë tanket e para nga Britania e Madhe, Polonia dhe Gjermania, si dhe artileri me rreze të gjatë nga Shtetet e Bashkuara për sulmet në Krime.
“Në mënyrë që konflikti ushtarak të përfundojë, Rusia duhet të humbasë,” tha kancelari gjerman Olaf Scholz një ditë më parë, duke folur në Forumin Ekonomik Botëror në Davos. Sipas tij, Gjermania dhe partnerët e saj po furnizojnë me armë Kievin për të arritur këtë qëllim. Gjithashtu, disfatën e Rusisë si kusht të domosdoshëm për përfundimin e konfliktit e deklaroi Sekretari i Përgjithshëm i OKB-së, Jens Stoltenberg. Ai e quajti situatën aktuale në frontin në Ukrainë “një moment kyç”.
Nga ana tjetër, presidenti rus Vladimir Putin shpalli fitoren “e pashmangshme” të Rusisë në luftën kundër Ukrainës. “Për sa i përket rezultatit përfundimtar dhe fitores që është e pashmangshme, ka disa gjëra që nuk kanë ikur dhe janë në thelb të fitores sonë. Ky është uniteti dhe kohezioni i popullit rus dhe, në përgjithësi, i popullit shumëkombësh rus”, tha Putin gjatë një vizite në fabrikën Obukhov në Shën Petersburg. Ai gjithashtu i kërkoi industrisë që të sigurojë një bazë për “fitoren” në front.
Në dhjetor, Putin tha se autoritetet ruse “nuk janë të çmendur” dhe “janë të vetëdijshëm se çfarë janë armët bërthamore”. Në të njëjtën kohë, ai theksoi se Rusia jo vetëm që ka armë bërthamore, por janë “në një formë më të avancuar dhe më moderne se çdo vend tjetër bërthamor”./Kosovatimes/
