Deputeti i Lidhjes Demokratike të Kosovës, Avdullah Hoti, deklaroi se pagat në sektorin publik duhet të rriten për të paktën 10%, ndërsa vlera e koeficientit duhet të jetë 137.5 euro.
Ai, në një postim në Facebookm shkroi se çfarëdo vlere e koeficientit më pak se 125 euro, nënkupton ulje të pagave në fuqi blerëse në mallra dhe shërbime. Sipas tij, Qeveria nuk i përshtati pagat për normën e inflacionit, e as nuk e rriti pagën minimale.
“Për shkak të rritjes enorme të çmimeve të produkteve të konsumit të përditshëm, vlera reale apo fuqia blerëse e pagave u zvogëlua dukshëm gjatë vitit 2022” , shkruan Hoti.
Sipas tij, pagat në sektorin publik nuk janë rritur që nga viti 2016, kur u zbatua rritja prej 2% deri në 20% për shkak të viteve të përvojës së punës.
“Për shkak të ndryshimeve strukturore në ekonomi dhe në nevojat për konsum të familjeve, si dhe inflacionit inercial për periudhën 2016-2021, është e natyrshme që pagat reale duhet të rriten së paku me 10%”, shkruan pos tjerash Hoti. /Kosovatimes/
