Laboratori i toksikologjisë është jashtë funksionit që nga pezullimi i 3 punonjësve të kësaj njësie brenda Institutit të Mjekësisë Ligjore, pas zhdukjes së mostrave në rastin Astrit Dehari. Vendet e tyre nuk janë zëvendësuar pasi në Kosovë ka pak laborantë të toksikologjisë sikur edhe numër i ulët i mjekëve ligjorë.
Brenda institutit profesionistët e mjekësisë ligjore dhe stafi në përgjithësi po përballen me volum të shtuar të punës dhe vështirësi në realizimin e tyre.
Ndjeshmëria e punës brenda hapësirave të ftohta ku bëhen autopsitë e trupave të pajetë mbetet në plan të dytë për punonjësit e Institutit të Mjekësisë Ligjore. Pak kuadro të dala nga kjo fushë në Kosovë, janë përkthyer në ngarkesë për stafin aktual.
Gjendja është rënduar edhe më tepër pas zhdukjes së mostrave në rastin Astrit Dehari vitin e kaluar, ku disa zyrtarë dhanë dorëheqje e të tjerë u suspenduan.
“Siç e dini nga rasti që kemi pas disa punonjës janë suspenduar dhe ne kemi mbet keq te laboratori i toksikologjisë. Aty kanë qenë 4 punonjës të suspenduar, vetëm një është kthyer në punë dhe 3 të tjerë po presin vendimin e komisionit disiplinorë. Tash jemi duke i kryer vetëm rastet urgjente sepse nuk mund të punojmë gjatë gjithë kohës”, thotë Ditor Haliti, zëvendësdrejtor i IML-së.
Laboratori i toksikologjisë është pothuajse jashtë funksionit. Aty punohet vetëm teknikisht.
“Tash për tash aty punohet vetëm teknikisht. Merren mostrat dhe sistemohen, ruhen por nuk përpunohen analizat. S’ka staf”, thotë Musa Gashi, nga IML.
“Tash jemi duke I kryer vetëm rastet urgjente sepse nuk mund të punojmë gjatë gjithë kohës”, thotë Ditor Haliti.
Për këtë situatë ka folur në RTK edhe zëvendësministri i Drejtësisë, Blerim Sallahu. Ai tha se Kosova ka pak mjekë ligjorë dhe laborantë të toksikologjisë, gjë që vështirëson punën brenda IML-së.
