Gjenerali i Forcave Ajrore të SHBA, Mike Minihan, kreu i Komandës së Transportit Ajror , tha se lufta midis Kinës dhe SHBA-së për Tajvanin mund të fillojë në vitin 2025. Ai paralajmeroi për këtë në një memo dërguar vartësve, sipas NBC News.
“Shpresoj se jam gabim. Intuita më thotë se do të më duhet të luftoj në vitin 2025”, tha gjenerali në një mesazh. Mike Minihan vuri në dukje se si SHBA ashtu edhe Tajvani do të mbajnë zgjedhje presidenciale në vitin 2024 dhe presidenti kinez Xi Jinping mund ta përdorë këtë në përpjekje për të marrë nën kontroll Tajvanin.
Komandanti udhëzoi oficerët që të raportonin deri më 28 shkurt për të gjitha ngjarjet kryesore që lidhen me përgatitjet për betejën me Kinën. Oficerët u udhëzuan gjithashtu në mars të “konsiderojnë çështjet e tyre personale” dhe të zgjidhin çështjet ligjore.
Një përfaqësues i komandës së transportit ajror konfirmoi vërtetësinë e memorandumit të dërguar. Ai vuri në dukje se urdhrat e gjeneralit bazohen në përpjekjet që janë bërë që në vitin 2022 për t’u përgatitur “për një konflikt të ardhshëm nëse kontrolli dështon”.
Një zëdhënës i Departamentit Amerikan të Mbrojtjes, nga ana tjetër, tha se komentet e Mike Minihan “nuk pasqyrojnë pikëpamjen e Departamentit për Kinën” dhe Pentagoni është i përkushtuar për të mbajtur rajonin Indo-Paqësor “paqësor, të lirë dhe të hapur”.
