Qendrat e strehimit për gratë dhe fëmijët të cilët përjetojnë dhunë në familje përballën me shumë sfida e njëra ndër to është mungesa e financimit të qëndrueshëm. Drejtues të institucioneve edhe organizatave për mbrojtjen e grave kanë bërë të ditur se në periudha të ndryshme si pasojë e mungesës së buxhetit, janë detyruara t’i mbyllin këto qendra dhe kërkojnë nga institucionet përgjegjëse të sigurojnë një linjë të qëndrueshme të financimit nga qeveria.
Në Kosovë viteve të fundit është rritur numri i rasteve të raportuara të dhunës në familje. E qendrat e strehimit për gratë dhe fëmijët të cilët përjetojnë dhunë në familje po përballen me mungesë të buxhetit. Drejtoresha e Qendrës për Mbrojtjen e Grave dhe Fëmijëve në Prishtinë, e cila është qendra me e madhe në Kosovë, Zana Hamiti i tha Radio Kosovës se në mungesë të buxhetit ka pasur raste që strehimoret nuk kanë mundur të pranojnë raste të reja të cilat kanë kërkuar ndihmë. Ajo tha se qendrat e strehimit kanë kërkuar që për aq kohë sa janë të licencuar, të kenë një linjë të qëndrueshme buxhetore nga Qeveria.
“Për sa i përket financimit të strehimoreve është pak e vështirë qëndrueshmëria financiare, për arsye se ne, si organizatë jo qeveritare nuk e kemi një linjë buxhetore që është e qëndrueshme. Ka ndodh që për shkak të kësaj situate shpeshherë në muajin janar dhe shkurt strehimoret janë mbyllur, nuk kanë ofruar shërbime për rastet e tjera përveç atyre që i kanë pasur”, tha Hamiti.
Se financimi nga qeveria është shumë i vogël e thonë edhe drejtues të organizatave për mbrojtjen e grave. Besarta Breznica nga Rrjeti i Grave të Kosovës, në një përgjigje për Radio Kosovën tha se qendrave strehimore duhet t’u sigurohet një buxhet me i lartë dhe i qëndrueshëm pasi fondet nga donatorët e ndryshëm nuk janë të qëndrueshme.
“Strehimoret marrin mjete mjaft të pakta nga Ministria e Financave. E donatorët e tjerë nuk janë stabil pasi mund të largohen shpejt. Këto donacione mund të jenë për një vit mandej të ndalohen. Kështu që fondet e tjera nuk janë stabile. Dhe ne kërkojmë nga shteti që strehimoret të kenë linjë buxhetore me stabile dhe të rritet buxheti”, tha Breznica.
Ndihmë financiare këtyre qendrave u ofrohen edhe nga komunat. Drejtoresha për Punë dhe Mirëqenie Sociale në Komunën e Prishtinës, Adelina Sahiti i tha Radio Kosovës se nga ky vit, këtyre viktimave pas qëndrimit gjashtë (6) mujor në këto qendra strehimi, Komuna e Prishtinës do t’u ofrojë ndihmë prej gjashtë muajsh deri në dy vite të tjera, pasi shumë prej tyre për shkak të kushteve të rënda ekonomike detyrohen të kthehen te dhunuesit.
“Në strehimore viktimat e dhunës qëndrojnë deri në gjashtë (6) muaj dhe pastaj për fat të keq, në mungesë të kushteve ekonomike dhe një vend të punës detyrohen të kthehen të dhunuesi. Ne si komunë në fund të nëntorit të vitit 2022 kemi marrë vendim për t’iu ofruar mbështetje financiare në një periudhë prej 6 deri në 12 muaj me vlerë prej 500 eurosh për një viktimë”, deklaroi Sahiti.
Të mbijetuarat e dhunës në familje pas përfundimit të qëndrimit në këto qendra, përballën me sfidën e ri-integrimit. Sipas të dhënave të Policisë së Kosovës, në vitin 2022 janë raportuar 2793 raste të dhunës në familje. Në Kosovë aktualisht janë dhjetë strehimore që ofrojnë ndihmën dhe shërbime për gratë dhe fëmijët që përjetojnë dhunë në familje, një për trafikimin me qenie njerëzore dhe dy për fëmijët e braktisur.
