Përfaqësuesi Special i Bashkimit Evropian për dialogun ndërmjet Kosovës dhe Serbisë, Miroslav Lajçak ka konfirmuar se takimi i ardhshëm mes kryeministrit të Kosovës, Albin Kurti dhe presidentit të Serbisë, Aleksandar Vuçiq, me ndërmjetësimin e Përfaqësuesit të Lartë të BE-së për Politikë të Jashtme, Josep Borrell, do të mbahet në Ohër.
Lajçak, pas takimit me zëvendëskryeministrin e Maqedonisë së Veriut, për çështje evropiane, Bojan Marichikj ka shkruar në Twitter, duke thënë se e ka falënderuar Maqedoninë e Veriut për përkrahjen që po i jep procesit të dialogut Kosovë – Serbi.
“Jam mirënjohës ndaj Maqedonisë së Veriut për përkrahjen e saj të fuqishme ndaj dialogut dhe mezi po pres takimit e ardhshëm për dialog në Ohër në fund të këtij muaji. Ne po ashtu kemi diskutuar për çështje thelbësore për të ardhmen evropiane të Maqedonisë së Veriut”, ka shkruar Lajçak në Twitter.
Ky takim është paralajmëruar se do të mbahet më 18 mars, kur Borrell pritet ta vizitojë Maqedoninë e Veriut.
