Presidenti i SHBA Joe Biden kishte karcinoma të qelizave bazale dhe indi kanceroz u hoq, konfirmoi mjeku i Shtëpisë së Bardhë Kevin O’Connor.
Ai tha se biopsia e kryer në shkurt e vërtetoi këtë dhe shtoi se Biden do të vazhdojë të jetë nën mbikëqyrjen e një dermatologu në kuadër të ekzaminimeve mjekësore.
Sipas tij, vendi i biopsisë është shëruar dhe nuk ka nevojë për ndërhyrje shtesë.
Mjekët thanë muajin e kaluar se Biden, 80 vjeç, është i shëndetshëm dhe i aftë për të kryer detyrat e tij.
Karcinoma e qelizave bazale zhvillohet në qelizat bazale – një lloj qelize në lëkurë që krijon qeliza të reja të lëkurës ndërsa ato të vjetrat vdesin.
Ky kancer i lëkurës me rritje të ngadaltë zakonisht shkaktohet nga ekspozimi ndaj rrezeve të diellit.
