Një shtetas serb është arrestuar në pikën kufitare Gostun, në kufirin me Malin e Zi, me gjysmë ton kokainë të zbuluar në kamionin-cisternë që po drejtonte, njoftuan të enjten mediat e Beogradit dhe Podgoricës, duke cituar Agjencinë e Sigurisë Kombëtare të Malit të Zi.
Shtetasi serb Miroslav Gjuriq nga Loznica, i cili ka një kompani të regjistruar në Danilovgrad, me një kamion cisternë transportonte rreth 500 kilogramë kokainë, e cila u zbulua kur ai u largua nga Mali i Zi.
Agjencia malazeze, në bashkëpunim me kolegët e saj në Serbi, po kontrollon kompaninë “Royal Šped”, e cila është e regjistruar në kamionin në të cilin është gjetur një ngarkesë me kokainë me vlerë milionëshe, raporton “Vijesti” i Podgoricës .Aktualisht po kryhen kontrolle operacionale dhe është marrë cisterna për matje të saktë të ngarkesës, thuhet.
Sipas pohimeve të bashkëbiseduesit të paidentifikuar të gazetës Podgorica, kamioni ka hyrë në Mal të Zi më 4 mars kur ka dorëzuar gazin për kompaninë “Petrol”.
Në regjistrin e Gjykatës Ekonomike, kompania “Royal šped” është themeluar më 2 qershor 2021 për transportin rrugor të mallrave, me kapital total prej një euro, dhe pronar dhe themelues është shtetasi serb Miroslav Gjuriq, me vendbanim në Danilovgrad. .
Vitin e kaluar kompania ka pasur një qarkullim të vogël, duke u nisur nga pasqyra financiare e dorëzuar në Drejtorinë e të hyrave dhe doganave, përcjell “Vijesti”.
MPB-ja e Serbisë ende nuk ka komentuar lidhur me këtë rast.
