Deputeti i Aleancës për Ardhmërinë e Kosovës (AAK), Pal Lekaj, në një konferencë për media të premten deklaroi se AAK nuk do të lejojë rritjen e çmimit të energjisë elektrike.
Ai po ashtu përmendi edhe mundësinë e organizimit të protestave nëse është e nevojshme. Lekaj e ka vlerësuar absurde kërkesën e Zyrës së Rregullatorit për Energji (ZRrE) për rritjen e tarifave për 14%.
Lekaj tha se një rritje e tillë e çmimeve do të ishte e dëmshme për të gjithë qytetarët, bizneset dhe ndërmarrjet e vendit.
Sipas tij, nëse kjo rritje ndodh, qytetarët do të shtyhen në varfëri ekstreme dhe në luftë për mbijetesë.
Ai tha se AAK-ja është kategorikisht kundër kësaj rritjeje dhe do ta pengojë që të ndodhë përmes angazhimit të saj politik në Kuvend dhe në komisionet përkatëse, por nëse është nevoja edhe me organizim të protestave me qytetarët.
Lekaj ka pohuar se qeveria nuk është e interesuar t’ua lehtësojë jetën qytetarëve, por vetëm t’ua rëndojë.
Lekaj po ashtu theksoi se është absurde që çmimi të rritet kur qeveria ka dhënë subvencione për zbutjen e çmimit të energjisë elektrike. Ai theksoi gjithashtu se KEK-u ka eksportuar rrymë në vlerë prej miliona eurosh, andaj nuk ka arsye të rrisë çmimin e energjisë.
Zyra e Rregullatorit për Energji pritet të vendosë për tarifat e reja të energjisë deri në fund të këtij muaji dhe më pas ato do të hyjnë në fuqi nga 1 prilli.
