Instituti Kombëtare i Shëndetësisë Publike të Kosovës ka ngritur alarmin lidhur me resurset ujore të zonës së Marecit në Prishtinë nga hulumtimeve të bëra pas shqetësimit të qytetarëve lidhur me cilësinë e ujit. Nga inspektimet e bëra të resurseve të ujit në terren u identifikua se ky fshat furnizohet me ujë për pije nga disa burime natyrore dhe nga puse individuale.
“Këto resurse janë të pambrojtura dhe si të tilla me potencial të madh të mundshëm të ndotjes”, thekson IKShPK. Një nga hulumtimet është edhe mostra e ujit e marrë në familjen Pacolli (furnizohet nga burimi natyror) e cila rezultoi me mungesë të klorit rezidual, me turbullirë të shtuar
(mbi 20 NTU) dhe me ngjyrë të ujit të verdhë në të gjelbër.” Ky ujë si i tillë nuk është për pije dhe përbën rrezik potencial për shëndetin e banorëve. Po ashtu, edhe rezultati i analizës kimike ka mos përputhshmëri me standardet e paraparë sipas UA nr. 10/2021”, thekson instituti. Rezultatet bakteriologjike priten pas 48 orëve!
Duke pasur parasysh rezultatet e analizave laboratorike dhe gjetjet në terren, IKShPK në pajtim me përgjegjësitë e veta ligjore rekomandon autoritetet përgjegjëse – KK Prishtina dhe KRU “Prishtina” që secila prej tyre në kuadër të kompetencave dhe përgjegjësive të ndërmarrin masa të nevojshme për zgjidhjen afatgjate të furnizimit me ujë të sigurt për banorët e kësaj zone. Problemi bëhet edhe më madhor pasi që situatë e ngjashme është edhe në 21 fshatra tjera të kësaj zone.
“Me qëllim të mbrojtjes dhe avancimit të shëndetit të banorëve, IKShPK e sheh si nevojë imediate zgjidhjen e problemit të furnizimit me ujë për qytetarët e kësaj zone. Deri në zgjedhjen afatgjatë të problemit të furnizimit me ujë, IKShPK rekomandon banorët që burimet natyrore ekzistuese dhe puset individuale: të pastrohen mekanikisht nga mbeturinat; të mirëmbahet (të sanohet kaptazha, rezervuari dhe gypi shpërndarës) dje dhe përfundimisht uji të dezinfektohet. IKShPK konsideron që zbatimi i këtyre masave është i domosdoshëm për tejkalimin e problemit aktual të cilësisë së ujit për pije dhe rrjedhimisht mbrojtjen e shëndetit të popullatës. /Kosovatimes/
