Kryeministri i Kosovës, Albin Kurti ka thënë se pret nga bashkësia ndërkombëtare që të jetë me e ashpër dhe të dënojë Serbinë, e cila nuk po tregohet serioze në raport me bisedimet dhe marrëveshjen me Kosovën. Këtë deklarate ai e bëri para mediave, pasi mori pjesë në konferencën e dytë nacionale për shënimin e Ditës Botërore të Punës Sociale Sipas Kurtit, Serbia kur zhvillohen takimet thotë se nuk nënshkruan, e ndërmjet takimeve thotë se nuk zbaton asgjë. “Unë besoj se tash nuk do të duhej që topi të jetë në anën e Kosovës, por në anën e Serbisë. Në vend që të pyetet Serbia pse nuk po e nënshkruan, më pyesin mua se kur do ta bësh Asociacionin”, u shpreh kreu i ekzekutivit.
Ai po ashtu tha se marrëveshja do të duhej të fillonte së zbatuari qysh dje. Kryeministri Albin Kurti deklaroi të martën se neni 7 i planit të Bashkimit Evropian për normalizimin e marrëdhënieve Kosovë-Serbi, në të cilën përmendet vetmenaxhimi i komunitetit serb në Kosovë, është formulim i cili “i përket në mënyrë shumë besnike dhe të saktë Konventës Kornizë për mbrojtjen e pakicave kombëtare, sipas Këshillit të Evropës”.
“Ne do të jemi në kontakt të vazhdueshëm me ndërmjetësit evropianë. Me partnerët tanë amerikanë që i falënderojmë për kontributin, gjithashtu jemi në komunikim të vazhdueshëm dhe do të duhej që atë formulimin për vetmenaxhimin e komunitetit serb të adresojmë çështjet të cilat na paskan ngelur pa u përmbushur. Për ne siç e kam thënë edhe në Kuvend, bëhet fjalë për një formulimi i cili i përket në mënyrë shumë besnike dhe të saktë Konventës Kornizë për mbrojtjen e pakicave kombëtare, sipas Këshillit të Evropës”, tha kryeministri.
