Partia Socialdemokrate (PSD), të martën, ka dorëzuar në Gjykatën Themelore në Prishtinë, padi ndaj Agjencisë për Informim dhe Privatësi (AIP), duke kërkuar anulimin e vendimit të AIP-së, me të cilin PSD-ja është dënuar me 20 mijë euro gjobë për publikimin e të dhënave të peticionit kundër Asociacionit.
Pas dorëzimit të kësaj padie në gjykatë, sekretarja e përgjithshme e PSD-së, Teutë Rrusta ka thënë para mediave se baza kryesore mbi të cilin është ndërtuar gjoba, të cilën e kanë marrë si parti, është tejmase e papranueshme.
Sipas Rrustës, ky vendim nga AIP është marrë nën presion, në mënyrë të shpejtë dhe pa u ankuar askush për publikimin e të dhënave.
“Baza e tyre qëndron tek fakti se ata thanë se qëllimi i peticionit ka qenë dërgimi i këtij peticioni në Kuvend, në momentin që është grumbullu dhe pastaj aty përfundon qëllimi i peticionit, mirëpo, ky është gabimi elementar ku teksti i peticionit për të cilin jemi tu fol nuk është i tillë”, ka thënë Rrusta.
Tutje, ajo ka thënë se qëllimet e peticionit i përcakton teksti i vetë peticionit dhe sipas saj nuk mund t’i përcaktojë Agjencia e as t’i interpretojë ato.
“Ky peticion madje nuk ka qenë as nismë legjislative, se po të ishte kështu vërtetë Agjencioni do të kishte të drejtë për shkak se ai pastaj i nënshtrohet disa rregullave tjera, dërgimit në Kuvend e kështu me radhë”, ka thënë Rrusta.
Rrusta po ashtu ka thënë se ky peticion që është mbledh atëherë ka pas qëllimin politik dhe kundërshtimin e bashkësisë së komunave me shumicë serbe, i cili nuk i nënshtrohet asnjë date apo norme juridike, e që sipas saj adresa ka qenë Qeveria e Kosovës e jo Kuvendi, siç
pretendon Agjencia për ruajtjen e të dhënave dhe informim.
“Pra, duhet me pas të qartë se nëse lajthitja është qëllimi i peticionit, cila është ideja pastaj e gjobitjes mbi këtë qëllim. Pra, është evidente në anën tjetër që nuk ka pas ankesë nga ndonjë parti politike apo nga ndonjë qytetar për këto të dhëna, nëse janë përdorur dhe kanë pas problem me këtë gjë”, deklaroi ajo.
E njëjta ka thënë se padisë ia kanë bashkëngjitur edhe fotot ku të dhënat nuk janë publikuar, por sipas saj ka qenë një aksion politik të cilin e kanë bërë në vazhdën e shumë aksioneve politike në kundërshtim të Asociacionit.
“Në njërën anë, ky peticion është bërë në praninë e policisë dhe është shtri aty në prani të policisë dhe menjëherë është tërhequr nga aty po ashtu nga policia. Pra, nuk ka pasur rrezikim të të dhënave dhe është e qartë është bërë në oborrin e Qeverisë dhe po shpresoj që oborri i Qeverisë nuk do duhej të konsiderohej një vend aq i hapur, i rrezikshëm për publikun”, ka shtuar tutje Rrsuta.
Ajo tha se vite më parë ky peticion është përdorur edhe nga Lëvizja Vetëvendosje, kur e ka dërguar atë botë Ramush Haradinaj këtë peticionin në Kuvend.
“Pra, ku ishte atëherë Agjencioni për mbrojtjen e të dhënave dhe informim”, u shpreh ajo.
Rrusta në fund ka thënë se kërkojnë që ndërkohë të shtyhet vendimi për pagesën prej 20 mijë euro, për shkak se për Partinë Socialdemokrate kjo është shumë e papërballueshme.
PSD padit Agjencinë për Informim dhe Privatësi, shkak gjoba prej 20 mijë euro
Prishtinë- Partia Socialdemokrate (PSD), e ka paditur Agjencinë për Informim dhe Privatësi (AIP), lidhur me gjobën prej 20 mijë euro.
Lajmi u bë i ditur përmes një njoftimi nga PSD, ku thuhet se vendimi për gjobën, ishte politik.
Përmes padisë, PSD ka kërkuar anulimin e vendimit të AIP-së.
“Padisim Agjensionin për Informim dhe Privatësi për vendimin e tyre politik- Vendimi për dënimin e PSD-së me 20,000€ ka vetëm një qëllim: pengimin e aktivitetit të saj politik. Baza ligjore mbi të cilën është shkruar kjo gjobë lëngon nga zbatimi i drejtë i dispozitave ligjore, përkatësisht i dispozitave përkatëse të Ligjit nr. 06/L-082 për Mbrojtjen e të Dhënave Personale. PSD sot ka paditur këtë Agjension, duke kërkuar anulimin e vendimit, qartësisht të pabazë dhe tendencioz”, thuhet në njoftim.
