Ish prokurori Elez Blakaj e cilësoi si të neveritshme debatet jo vetëm në Kuvendin e Kosovës, por edhe nëpër emisionet televizive lidhur me reformat në drejtësi.
Ai në një postim në profilin e tij në facebook shkruan:
“E neveritshme të dëgjosh nivelin e debatit në Kuvendin e Republikës së Kosovës, studio televizive dhe media të ndryshme duke folur për drejtësi, me theks të veçantë ata të cilët dje shanin e organizonin konferenca për shtyp e vraponin pas debateve në televizione të ndryshme, e sot na shesin moral – hipokrita klasik! Secili qytetar, në veçanti institucionet duhet ta lajmërojnë çdo dyshim për secilën veper penale dhe të bashkëpunojnë ngushtë me organet kompetente në të gjitha fazat e procedurës në interes të zbardhjes së rastit, pavarësisht kush është emri i përveçëm e/i të dyshuarit e po ashtu sjelljes, motivit dhe performancës së zbehtë të organeve të drejtësisë!
Është e dukshme dhe e kuptueshme se përfituesit më të mëdhenj nga e gjithë kjo rrëmujë janë të gjithë ata të cilët nuk janë të interesuar të ketë reforma në drejtësi. Madje të gjithë këta përfitues, lutën vazhdimisht që të ketë sa më shumë debate, tensione, komente dhe përplasje të tilla sepse kështu mbijetojnë! Andaj, sa më pak që flitet dhe komentohet për “drejtësinë”, aq më shumë reforma do të kemi!”, shkruan ai.
Blakaj pati edhe një sugjerim për të gjithë gazetarët, në veçanti për gazetarët hulumtues, që të kërkojnë informacione për fatin e mijëra lëndëve të regjistruara si PPN (penale të ndryshme).… e frikshme si trajtohen dhe çfarë fshihet aty! /Kosovatimes/
