Kryeministri i Kosovës, Albin Kurti, ka reaguar lidhur me ngjarjen tragjike që ka ndodhur në Beograd, me ç’rast një adoleshent 14-vjeçar vrau në shkollë 8 nxënës dhe rojën e sigurisë, si dhe ka plagosur disa të tjerë.
Pas presidentes Vjosa Osmani, edhe kryeministri Albin Kurti, ka reaguar për sulmin e djeshëm në një shkollë në Beograd.
Një nxënës 14 vjeç, ka vrarë tetë fëmijë dhe rojën si dhe ka plagosur edhe pesë të tjerë, para se të arrestohet nga policia.
Kryeministri Kurti u ka shprehur ngushëllime familjeve të viktimave teksa u ka uruar shërim të shpejtë edhe të lënduarve nga ky rast.
“Dëshiroj të shpreh ngushëllimet e mia më të thella për viktimat e të shtënave në shkollë në Beograd dhe për familjet e tyre. Gjithashtu u uroj shërim sa më të shpejtë të lënduarve në këtë ngjarje tragjike”, ka shkruar Kurti në Twitter.
Ngushëllime gjatë ditës së djeshme për këtë ngjarje ka shprehur edhe presidentja e vendit, Vjosa Osmani e cila ka deklaruar se nuk ka asgjë më të rëndë sesa humbja e jetës së fëmijëve.
