Kolegji i Kirurgeve te Kosoves në një postim në profilin e tyre në facebook kanë postuar lajmin për kirurgun Ass. Prof. Dr. Mentor Ahmeti, FACS, FKCS, i cili është zgjedhur Kryetar i Ardhshëm i Kolegjit Amerikan të Kirurgëve, Dega e Dakotës së Veriut “Një lajm tjetër i rëndësishëm nga takimi i Kolegjit Amerikan të Kirurgëve, Dega e Dakotës së Veriut, është se Anëtari i Kolegjit të Kirurgëve të Kosovës, Ass. Prof. Dr. Mentor Ahmeti, FACS, FKCS, njëherit edhe Shef i Qendrës së Nivelit të Parë të Traumës në qendrën spitalore Sanford Medical Center në Fargo, North Dakota, është zgjedhur Kryetar i ardhshëm i Degës së Kolegjit Amerikan të Kirurgëve – Dakota e Veriut, SHBA”, shkruan KKK-së.
Dr. Ahmeti është gjithashtu Drejtor i Asociuar i Programit Specialistik Kirurgjik pranë Fakultetit të Mjekësisë në Universitetin e North Dakotës, e gjithashtu Drejtor i Ҫështjeve Akademike dhe Hulumtimeve Shkencore. Si projekt parësor në pozitën e kryetarit të ardhshëm të ACS-ND dhe Shefit të Traumës, Dr. Ahmeti do ta ketë themelimin e programit ATLS në Kosovë, si dhe mbajtjen e parë të kursit kryesor për trajtimin e traumës – ATLS në Kosovë gjatë këtij viti, nën sponzorizimin e Sanford Medical Center Fargo dhe në bashkëpunim me Kolegjin e Kirurgëve të Kosovës. Me këtë rast Dr. Rifat Latifi, Kryetar i Kolegjit të Kirurgëve të Kosovës theksoi se: “Zgjedhja e Dr. Mentor Ahmetit, Kryetar i ardhshëm i Kolegjit Amerikan të Kirurgëve, Dega e Dakotës së Veriut, është një arritje e madhe për Dr. Mentorin, por dhe të gjithë ne. “Është dëshmi e qartë për përparimin dhe ngritjen e kirurgëve shqiptarë nëpër botë, mburrje për neve të gjithë, si dhe do të mundësojë lidhjen edhe më të fuqishme të KCS dhe Kolegjit Amerikan të Kirurgëve dhe degëve të shumë shteteve të ndryshme amerikane, e po ashtu edhe vendeve të ndryshme të botës”./Kosovatimes/
