Presidentja e Kosovës, Vjosa Osmani, e ka përkujtuar nënkryetarin shumëvjeçar të LDK-së dhe deputetin e Kuvendit të Kosovës, Fehmi Aganin, në 24-vjetorin e vrasjes nga forcat serbe.
Ajo ka thënë se akademik Agani ka qenë dorë e djathtë e presidentit historik, dr. Ibrahim Rugova, derisa vizionin dhe trashëgiminë e tij për Kosovën e ka vlerësuar si frymëzim për brezat.
“Sot e kujtojmë me respekt akademik Fehmi Aganin, figurën emblematike të lëvizjes për lirinë e Kosovës, njeriun që përkushtimin e tij ndaj dijes e arsimit e kombinoi me aktivitetin politik, duke qenë dorë e djathtë e presidentit historik, dr.Ibrahim Rugova, me të cilin u angazhua deri në vdekje në përmbushjen e idealit për Kosovën shtet të pavarur. Më 6 maj të vitit 1999, në agun e lirisë, vizionari e përbashkuesi, akademik Agani u vra mizorisht nga forca të regjimit gjenocidal të Serbisë. Vizioni dhe trashëgimia e tij për Kosovën do të jetë frymëzim për brezat”, thuhet në deklaratën e presidentes Osmani.
Ajo tutje ka thënë se kujtimi për akademik Aganin “do të jetë i përhershëm, kurse sjellja e autorëve të krimit para drejtësisë do të jetë përkushtim i yni i vazhdueshëm!”/Kosovatimes/
