Pasi burri i saj vdiq vitin e kaluar, Kouri Richins shkroi një libër për fëmijë për përballimin e pikëllimit. Por tani ajo akuzohet për vrasjen e bashkëshortit të saj, shkruan Associated Press .
Richins u arrestua të hënën në Utah dhe u akuzua për helmimin e bashkëshortit të saj me një dozë fatale fentanyl në shtëpinë e saj në Camas, një qytet i vogël jo shumë larg Park City.
Prokurorët pretendojnë se Richins thirri policinë një natë në mars 2022 dhe u tha atyre që burri i saj, Eric , ishte ‘i ftohtë në prekje’. Kjo nënë e tre fëmijëve i tha policisë se i kishte bërë të shoqit një vodka për të festuar shitjen e suksesshme të shtëpisë dhe më pas shkoi në një dhomë tjetër për të vënë në gjumë njërin nga fëmijët. Kur u kthye, ajo gjeti burrin e saj të vdekur dhe thirri 911.
Ekzaminuesi mjekësor më vonë gjeti pesëfishin e dozës vdekjeprurëse të fentanilit në sistemin e tij.
Përveç akuzës për vrasje, Richins u akuzua gjithashtu për posedim të GHB, një drogë që përdoret shpesh për argëtim në klubet e natës.
Në një shfaqje televizive, Richins e quajti vdekjen e burrit të saj një ngjarje të papritur që e tronditi thellë atë dhe tre djemtë e tyre. Për fëmijët, tha ajo, është shumë e rëndësishme që “shpirti i një të dashur të ndjerë të mbetet gjithmonë i pranishëm në shtëpinë e tyre”.
“Unë u shpjegoj fëmijëve se edhe pse ai nuk është më fizikisht me ne, kjo nuk do të thotë që prania e tij e plotë është zhdukur”, u tha ajo drejtuesve të emisionit, të cilët e quajtën atë një “nënë të pabesueshme”.
