Ish ministrja nën mandatin qeverisës të LDK Hykmete Bajrami ka kritikuar rëndë Ministrin e Financave, Punës dhe Transfereve Hekuran Murati duke ia numëruar siç tha ajo dështimet e deritashme e për të cilat shpesh i janë hedhur LDK pa kurrfarë arsye.
Ajo në një postim në profilin e saj në facebook tha se po shpenzojnë mandatin me vajë në buzë.
Sipas Bajramit duhesh me qenë tepër i dështuar, kur je në pozitën e ministrit të financave, në vitin e tretë të mandatit dhe i takon një qeverie që i ka të gjitha nivelet e pushtetit e krejt çka ka me thënë është se “LDK-ja s’po me len me punu”.
“Le ministër, shko në shpi se kjo nuk është punë për ty – populli thotë nuk shkon me zor. Viti i tretë i mandatit: asnjë politikë fiskale; asnjë reformë strukturore; asnjë arritje; asnjë listë e publikuar e përfitueseve, investimet kapitale me të ulëtat në dekadën e fundit, skandale, korrupsion e nepotizëm gjithandej dhe ”fajet LDK-ja’”, shkruan Bajrami duke ia numëruar dështimet ministrit aktual. Më pas Bajrami i shtron pyetjen: Pse je kaq patetik ministër?
“LDK-ja ka me qenë në mbrojtje të kushtetutës gjithmonë. Rënia e çmimit të derivateve dhe vajit ushqimor nuk është bërë me ligj, pikërisht tregu i lirë/konkurrenca e ka bërë këtë. Ju s’keni qene në gjendje të ndërmerrni asgjë, andaj edhe në atë që ke thënë brenda disa rreshtave je kundërthënës edhe me vetën”, tha Bajrami.
Ajo më pas i shprehu nga distanca një këshill të sinqertë ministrin Murati.
“Mos hartoni/votoni ligje antikushtetuese sepse prapë do të përfundojnë në Gjykatë Kushtetuese, prej tani po të tregoj që Ligji për Fondin Sovran është i tillë për shkak të nenit 65 të tij, andaj mos thuaj nesër “LDK-ja i ka fajet”, sepse ne nuk ndjehemi në faj kur jemi në mbrojtje të Kushtetutës”.
Dhe në fund ajo ironizoi duke thënë se ‘Fajet i ka LDK-ja pse Martin Berishaj përpos me diplomaci merret kapak edhe me shit-blerjen e energjisë. Fajet i ka LDK-ja pse kryeshefi i KEK-ut ndodhet në paraburgim. Fajet i ka LDK-ja që s’ka asnjë njohje të shtetit të Kosovës”. /Kosovatimes/
