Policia e Kosovës nëpërmjet një komunikate për media ka dhënë detaje lidhur me zhvillimet e sotme në veri, përkatësisht në Zveçan, Zubin Potok dhe Leposaviq.
Me qëllim të pengimit të hyrjes së kryetarëve të komunave në vendet e tyre të punës, pranë hyrjeve të objekteve komunale të tri komunave janë tubuar një numër i konsiderueshëm i qytetarëve, për të mos lejuar hyrjen e tyre dhe stafit përcjellës në objektet zyrtare të komunave, njofton policia.
“Përveç personave të angazhuar dhe automjeteve/mjeteve të tyre të vendosura në afërsi dhe pranë objekteve komunale, në komunat veriore janë lëshuar edhe alarmet të cilat përdoren nga strukturat kriminale për mobilizim dhe tubime. Policia e Kosovës ka angazhuar njësitet relevante policore, me qëllim të menaxhimit të situatës dhe rrethanave të krijuara nga ana e qytetarëve të tubuar, të cilët pengonin organet e rendit dhe zyrtarët shtetëror në ushtrimin e së drejtës së tyre legjitime”, thuhet në komunikatë.
Tutje theksohet se zyrtarët e rendit publik vazhdimisht kanë biseduar me qytetarët e tubuar, duke kërkuar që të njëjtit të largohen dhe të mos pengohet puna e zyrtarëve shtetëror, të lirohet rruga dhe të lejohet hyrja e tyre në vendet e punës, mirëpo të njëjtit kanë refuzuar në vazhdimësi.
“Protestuesit në Zveçan pas një kohe kanë filluar të shfaqin dhunë, të fyejnë e të hedhin mjete të ndryshme të forta dhe shok bomba në drejtim të Policisë dhe automjeteve zyrtare, duke shkaktuar rrezik të drejtpërdrejtë dhe lëndime të lehta trupore deri tani ndaj pesë (5) zyrtarëve policorë të cilët më pas u janë kthyer detyrave policore”, theksohet më tej në komunikatën e Policisë së Kosovës.
Ndërkohë, gazetarët e RTK-së që ndodhen në terren kanë raportuar se situata në komunat veriore është e tensionuar, teksa janë dëmtuar edhe disa makina të policisë.
Pesë policë të lënduar në veri
Pesë policë janë lënduar nga serbët lokal në zhvillimet e sotme në veri është konfirmuar për RTK-në nga Policia e Kosovës.
Policia e Kosovës është duke i asistuar kryetarët e rinj të tri komunave në veri të vendit, Zubin Potok, Zveçan dhe Leposaviq, për ta ushtruar detyrën e tyre në objektet komunale.
Gjatë kryerjes së detyrës për mbarëvajtjen e rendit dhe sigurisë, policia ka hasur në kundërshtim të serbëve lokalë, me ç’rast janë dëgjuar edhe të shtëna armësh.
Kryetari i Zveçanit, Ilir Peci, ka hyrë tashmë në zyrën e tij në ndërtesën e komunës dhe ai e ka konfirmuar për RTK-në se ndodhet në zyrë për të kryer detyrën në ditën e parë të punës si kryetar i kësaj komune.
