Shtetet e QUINT-it, Franca, Gjermania, Italia, Mbretëria e Bashkuar dhe Shteteve të Bashkuara po edhe Bashkimi Evropian kanë paralajmëruar se veprimet e njëanshme në veri të Kosovës do të ndikojnë negativisht në raportet me këto vende.
Ambasadat e vendeve kanë dalur edhe me një deklaratë, duke përsëritur deklaratën e 26 majit që dënonte vendimin e qeverisë.
Përmes deklaratës i kanë kërkuar Qeverisë së Kosovës të mos marrë masë të re për hyrjen në ndërtesat komunale në Leposaviq, Zubin Potok dhe Zveçan.
“Ne jemi veçanërisht të shqetësuar për sigurinë dhe mirëqenien e civilëve, policëve, anëtarëve të EULEX-it dhe KFOR-it. Veprimet e reja të njëanshme do të ndikojnë negativisht në marrëdhëniet me vendet e Quintit dhe BE-në”, thuhet në deklaratë. “Kryetarët e zgjedhur gjithashtu duhet të tregojnë përmbajtje dhe të ndërmarrin veprime të menjëhershme për të demonstruar përkushtimin dhe përgjegjësinë e tyre për të përfaqësuar dhe shërbyer të gjithëve”.
QUINT-i dhe BE-ja theksojnë se dialogu i lehtësuar nga BE-ja është rruga drejt normalizimit të marrëdhënieve dhe pranimit në BE. “Në të njëjtën kohë ne i paralajmërojmë fuqishëm të gjitha palët kundër kërcënimeve ose veprimeve të tjera që mund të nxisin tensionet ose konfliktin”, kanë theksuar pesë vendet bashkë me BE-në. “I rikujtojmë palët që të punojnë së bashku në hapat e ardhshëm për zbatimin e Marrëveshjes së arritur ndërmjet Kosovës dhe Serbisë në shkurt dhe mars të këtij viti, duke përfshirë edhe ASMM, dhe të marrin pjesë në mënyrë konstruktive dhe të sinqertë në takimet e ardhshme të dialogut”.
