Ambasadori amerikan, Jeff Hovenier, përfundoi takimin me presidenten Vjosa Osmani-Sadriu.
Pas takimit, ai dha një deklaratë për media ku sqaroi se në takim me kreun e shtetit të Kosovës ishte me kërkesën e kësaj të fundit.
“Kisha takim me presidenten Vjosa Osmani me kërkesë të saj”, tha ai. “I keni parë reagimet tona. Janë shumë të qarta”, deklaroi Hovenier.
“ Jemi shumë të shqetësuar për situatën në veri”. Ai tha se kryetarët duhet të kryejnë detyrat e tyre, por jo të hyjnë më forcë në objektet e komunës.
Ai u shpreh se me ambasadorin e BE-së në Kosovë, Szunyog, ka ftuar në takim katër kryetarët e komunave veriore, por vetëm dy u janë bashkuar, i Zveçanit dhe Zubin Potokut.
“Edhe me ta diskutuam për shqetësimet lidhur me situatën”, tha Hovenier.
Sipas tij, Qeveria e ShBA-së, por edhe ato të vendeve të QUINT-it, e kanë potencuar se sa e rëndësishme është që zyrtarët të hyjnë në institucionet shtetërore pa përdorimin e forcës.
“Ky mbetet ende qëndrimi ynë. Edhe me kryetarët e diskutuam se si mund ta kryejnë detyrën e tyre dhe t’u shërbejnë qytetarëve, sidomos pa pasur nevojë për forcë që të hyjnë në institucione”.
Ambasadori Hovenier shkon te Presidentja Osmani
Ambasadori amerikan Jeff Hovenier, ka dalë nga takimi me kryetarët e komunave të Zveçanit dhe Zubin Potokut, të mbajtur në Zyrën e BE-së në Prishtinë.
Megjithatë, ai nuk ka shkuar në Ambasadë. Siç njofton gazetarja e RTK-së, Venera Xhoxhaj e cila po ndjek nga afër këtë takim, kreu i diplomacisë amerikane në Kosovë, vetëm disa minuta pas fillimit të takimit, ka shkuar në Presidencën e Kosovës.
Në këto momente (Ora 10:45 v.j), i njëjti ndodhet në takim me presidenten Vjosa Osmani-Sadriu.
Ndërkohë, brenda ndërtesës së Zyrës së BE-së në Prishtinë edhe më tej ndodhen dy kryetarët e komunave, Zveçan dhe Zubin Potok që janë nga PDK, por ftesës së ambasadorit amerikan, nuk i i janë përgjigjur pozitivisht, kryetarët e Leposaviqit dhe Mitrovicës së Veriut që janë nga LVV.
Përfundon takimi i Hovenierit me kryetarët Zveçanit e Zubin Potokut
Ka përfunduar takimi i thirrur nga ambasadori i SHBA-së në Kosovë, Jeff Hovenier, me kryetarët e komunave në veri të vendit.
Nga katër kryetarët, të Zveçanit, Leposaviqit, Zubin Potokut dhe Mitrovicës së Veriut, prezent ishin vetëm dy prej tyre, përkatësisht ata të Zubin Potokut dhe Zveçanit.
Siç njofton gazetarja e RTK-së, Venera Xhoxhaj, tashmë nga Zyra e BE-së ku është mbajtur ky takim, ka dalë ambasadori Hovenier.
Ndërkohë, edhe më tej nga ndërtesa nuk kanë dalë kryetari i Zubin Potokut, Izmir Zeqiri dhe ai i Zveçanit, Ilir Peci.
Pjesë e këtij takimi ishte edhe shefi i zyrës së BE-së, Tomas Szunyog.
Nga 4 kryetarët, ambasadorit Hovenier në takim i shkojnë 2 prej tyre
Tashmë takimi i ftuar nga ambasadori amerikan Jeff Hovenier me katër kryetarët e komunave të Kosovës në pjesës veriore të republikës, ka filluar në Zyrën e BE-së në Prishtinë.
Megjithatë, ftesës së kreut të diplomacisë amerikane në Kosovë u janë përgjigjur pozitivisht vetëm dy kryetarët e komunave të zgjedhur nga PDK.
Siç njofton gazetarja e RTK-së, Venera Xhoxhaj, në takim, prezent janë kryetari i Zubin Potokut, Izmir Zeqiri dhe ai i Zveçanit, Ilir Peci.
Megjithatë, në takim mungojnë kryetari i komunës së Mitrovicës së Veriut, Erden Atiq dhe Lulëzim Hetemi nga Lëvizja Vetëvendosje.
RTK ka provuar të kontaktojë dy kryetarët që mungojnë në këtë takim, por kjo ishte e pamundur.
Ndërkohë, pjesë e këtij takimi është edhe shefi i zyrës së BE-së, Tomas Szunyog.
