Presidentja e Kosovës, Vjosa Osmani ka thanë se bandat kriminale në veri të mbështetura nga presidenti serb Vuçiq, kanë për qëllim destabilizimin e Kosovës dhe të gjithë rajonit, prandaj veprimet e tyre të rrezikshme duhet të dënohen nga të gjithë. Osmani edhe një herë ka dënuar sulmet e strukturave ilegale serbe kundër policisë së Kosovës, KFOR-it dhe gazetarëve.
Këto deklarata presidentja Osmani i bëri gjatë një takimi që ka zhvilluar me zëvendëssekretarin e përgjithshëm për Paqe, Siguri dhe Mbrojtje në Shërbimin Evropian të Veprimit të Jashtëm (EEAS), i shoqëruar edhe nga Charles Fries, shefi i Zyrës së BE-së në Kosovë, Tomas Szunyog dhe shefi i EULEX-it, Lars-Gunnar Wigemark.
Presidentja Osmani po ashtu theksoi nevojën e koordinimit me partnerët ndërkombëtarë, si hap i domosdoshëm në mënyrë që të sigurohet paqe dhe stabilitet afatgjatë në vend e rajon, ndërsa ka përmendur rëndësinë e sundimit të ligjit dhe përballjën me drejtësinë për bandat kriminale dhe veprimet e tyre të kundërligjshme.
Ndër të tjera, në këtë takim u diskutua për progresin e Kosovës drejt Bashkimit Evropian, me ç’rast presidentja Osmani ka ritheksuar përkushtimin e Republikës së Kosovës për integrimin euroatlantik. Ne veçanti, Osmani ka informuar diplomatin Fries për progresin e bërë në fushën e sundimit të ligjit, që përfshinë edhe luftën kundër krimit të organizuar dhe korrupsionit si dhe për reformat demokratike dhe për përafrimin e plotë të politikës së jashtme dhe të sigurisë me atë të BE-së.
Ndërkaq zëvendës sekretari Fries vlerësoi lart bashkërendimin e Kosovës për dënimin publik dhe sanksionet kundër Rusisë si dhe përkrahjen e vazhdueshme ndaj Ukrainës.
