Promovohet libri “E vërteta e aktorit”
Në Bibliotekën Kombëtare të Kosovës u zhvillua promovimi librit “E vërteta e aktorit” të autorit Naim Berisha aktor në Trupën Rezidente të Teatrit Kombëtar të Kosovës. Ky libër sjellë fakte interesante të denoncimit publik të padrejtësive në trajtimin institucional dhe ligjor të aktorëve etj. Autori është ndalur vetëm në pasqyrimin e realitetit te dokumentuar, në trajtimin dhe padrejtësitë me të cilat përballen aktorët e teatrit që nga paslufta në Kosovë.
Sadik Krasniqi, profesor në fakultetin edukimit fizik dhe në fakultetin e arteve, profesor i lëndës në luftërat skenike, prezantoi para të pranishmëve poezinë e tij ‘Aktori’, të cilën siç tha ai e shkroi në kohën sa ishte pjesë e përgatitjes së një shfaqjeje teatri, pjesë e së cilës ishte edhe aktori Berisha. Në pasusin e fundit të poezisë të cilën e përmbyll me tog fjalëshin: aktori është vullkan që shpërthen, kur e liga zë vend. “Detyrë e çdo intelektuali është që vërtet të shpërthejë e para ngjarjeve që mund të ndodhin në mesin epopujve dhe kombeve, të luftojë për të kthyer mbarë dhe në rrjedha të duhura përparimin e çështjes kombëtarë.
Aktori Avni Dalipi tha gjatë këtij promovimi se libri “E vërtetat e aktorit” prezanton më së miri problemet që ballafaqohen krijuesit tanë, në këtë rast aktorët e teatrit. “Jo çdo herë këto procese kanë qenë të drejta por të shumtën e rasteve kanë qenë procese kanë ndikuar negativisht ne jetën e aktorëve duke ua humbur energjinë krijuese në drejtim të një energjie tjetër dhe shumë të nevojshme –energjia e mbrojtjes së të drejtës të vetë punës së aktorit”. Dalipi vlerësoi angazhimin jetësor të autorit për të mbrojtur të drejtën e aktorit dhe për të vënë në pah të gjitha shkeljet të cilat ndodhin në punën e tyre.
Studiuesi Imer Topanica, duke folur për librin, tha se kur e lexon të vërtetën që e prezanton Berisha në një gjuhë kaq të qartë e bindëse nuk mund e të mos e artikulosh një pyetje retorike. Tempulli i artë do të jetë i katandisur në një batak anti vlerash e skandalesh, një shoqërie të rënë në një letargji të thellë i duhet një zë i tillë kumbues që shkund e tronditë, zgjon e ndërgjegjëson. Topanica tha se ky libër, të mëson se përmasat e padrejtësive të shtrira në institucionet publike teatrore që kanë kufij të paimagjinueshme.
“Berisha nëpërmjet këtij libri, veç që na i çelë sytë, gati përdhunshëm për të na ndërgjegjësuar rreth gjendjes në të cilën ndodhemi, nuk flet vetëm nga prizmi i njohësit të teatrit, e as historisë së dhimbshme të tranzicionit në jetën teatrore, por si një intelektual i mirëfilltë”- tha ai ndër të tjerash.
Recensenti i këtij libri Enver Petrovci tha se ky libër trajton një temë të ndjeshme dhe të paprekur deri më tani nga ndonjë autor që merret me studimin e fushës së teatrit dhe filmit në Republikën e Kosovës. “Ky libër në mënyrë të besueshme jep diagnozën e gjendjes në të cilën ndodhen sot aktorët si kategori e perfomuesve të artit, por po ashtu jep rekomandimet se si kjo gjendje mund të ndryshojë ,përkatësisht fillojë të përmirësohet në të ardhmen si në rrafshin ligjor ashtu edhe në atë institucional. “Libri në mënyrë të kompletuar studion trajtimin e aktorit në rrafshin ligjor dhe institucional përcakton parametrat e këtij trajtimi dhe ngre nevojën e domosdoshmërisë së lëvizjeve përpara drejt trajtimit më të mirë të kësaj kategorie në të ardhmen”, vlerëson ai. Në fund autori Berisha duke iu falënderuar pjesëmarrësve në promovimin e librit, tha se atëherë kur politikanët të kuptojnë rëndësinë e artit dhe kulturës duke hequr dorë nga ndërhyrjet dhe interferimi në këtë fushë sa senzitive po aq edhe shpirtërorë do të fillojë të ndryshojë pozita denigruese e artistëve në përgjithësi dhe aktorëve në veçanti. /I.Krasniqi
