Presidentja e Kosovës, Vjosa Osmani, gjatë qëndrimit në Kishinau të Moldavisë, ka akuzuar Serbinë për financim të strukturave kriminale në veri, të cilat siç tha ajo, janë përgjegjëse për përshkallëzimin e dhunës në Kosovë. Osmani për mediumin serb “Danas” ka thënë se Serbia nuk e ka vendin në mes kombeve evropiane.
“Serbia nuk ka vend në mesin e kombeve evropiane”, tha Osmani dhe shtoi se anëtarët e strukturave kriminale në veri të Kosovës janë nën fletarrest ndërkombëtar dhe se autoritetet serbe janë në marrëdhënie shumë të ngushta me ta.
“Danas” përshkruan pritjen zyrtare të presidentes Osmani në tapetin e kuq me presidenten e Moldavisë.
Kujtojmë se në margjinat e samitit të dytë të Komunitetit Politik Evropian (EPC) që po mbahen në Kishinau, presidentja Osmani ka thënë se Serbia vazhdimisht ka shërbyer si satelit i Rusisë në rajonin e Ballkanit dhe ka tendenca për të destabilizuar Kosovën dhe vendet e tjera të rajonit.
“Serbia vazhdimisht ka shërbyer si satelit i Rusisë në rajonin tonë, duke tentuar vazhdimisht për ta destabilizuar Kosovën, por edhe shtetet e tjera të rajonit”, tha ajo.
