Deputetja e Kuvendit të Kosovës, Jeta Statovci, me nominim nga presidentja e Republikës së Kosovës, Vjosa Osmani Sadriu, po merr pjesë në takimin e pestë të nivelit të lartë të Rrjetit të Pikave Kryesore për Agjendën për Gratë, Paqen dhe Sigurinë në Uashington DC, SHBA.
“Pjesëmarrja, fuqizimi politik dhe ekonomik i grave me qëllim forcimin e një shoqërie të qëndrueshme dhe të aftë për t’i kontribuar sigurisë, paqes dhe stabilitetit të qëndrueshëm, është shumë me rëndësi. Kosova ka përfituar shumë në këtë drejtim nga partneriteti me SHBA-të”, ka shkruar në ajo në ‘Facebook’.
Sipas saj, rruga jonë e fuqizimit të demokracisë, paqes dhe sigurisë mbetet e koordinuar fuqishëm nga ky bashkëpunim i pa cenueshëm.
“Kosova mbetet projekt i rëndësishëm i vlerave dhe idealeve të demokracisë perëndimore, dhe ky është vizioni i qartë i shoqërisë tonë e cila aspiron standardin më të lartë të shoqërisë. Asgjë nuk e cenon lidhjen e Kosovës me SHBA-të, meqë asgjë nuk cenon vizionin tonë shumë të vendosur për demokraci”, tha ajo.
Po ashtu deputetja e Kuvendit të Kosovës, Jeta Statovci, ka takuar Zonjën Swanee Hunt, ish Ambasadoren e SHBA-ve në Austri dhe Zonjën Ambasadore Geeta Rao Gupta, të nominuarën e Presidentit Joe Biden nga Departamenti i Shtetit për përfaqësim të nivelit të lartë në nivel global të çështjeve gjinore.
“Ish Ambasadorja Hunt është mike e madhe e Kosovës, dhe njëherish mike e Gjeneralit shumë të dashur në Kosovë Wesley Clark. Zonja Hunt është njohëse e mirë e Ballkanit, ka qenë e fokusuar shumë në luftën e Bosnjës dhe zhvillimet tjera në rajon. Dr. Geeta Rao Gupa, ka merita të jashtëzakonshme në nivel global për angazhim të madh për barazi gjinore dhe siguri ekonomike për gratë dhe vajzat”, tha ajo.
