Autoritetet në Kosovë kanë hequr ndalimin për hyrjen e kamionëve dhe mallrave nga Serbia që ishte vendosur para tri ditësh, transmeton Frankfurter Allgemeine Zeitung, duke cituar RTS. Shërbimi kufitar i Kosovës kontrollon më nga afër kamionët dhe veturat nga Serbia, por ato lejohen të kalojnë, thuhet në raport, përcjell DW.
Shërbimi publik gjerman ARD thekson se Serbia, përkundër ankesave të Bashkimit Evropian dhe SHBA-së, ka iniciuar procedura ndaj tre policëve të ndaluar të Kosovës dhe se ata akuzohen për armëmbajtje pa leje. Në të njëjtën kohë, kujtohet se SHBA, BE dhe shumë vende perëndimore u bënë thirrje të dyja palëve që të ndërmarrin hapa për deeskalim.
Është raportuar edhe deklarata e të dërguarit special amerikan Gabriel Escobar , i cili ka thënë se policët “ose janë rrëmbyer ose kanë përfunduar në Serbi pa dashje” dhe se “ata duhet të lirohen pa asnjë parakusht”.
Gazeta Zeit thekson se KFOR-i të premten në mbrëmje ka njoftuar se pas hetimit të incidentit “nuk ka arritur të përcaktojë nëse arrestimi i tre policëve ka qenë në territorin e Kosovës apo Serbisë”. Ai mision ushtarak ndërkombëtar u kujtoi të dyja palëve se “duhet të koordinojnë me KFOR-in veprimet e forcave të tyre të sigurisë në zonën kufitare – dhe kjo nuk ka ndodhur në këtë rast”, shkruan gazeta gjermane.
Standardi vjenez shkruan për rritjen e presionit nga SHBA dhe BE ndaj Prishtinës.
“Qeveria e Kosovës nuk dëshiron të dorëzohet nën presionin e ambasadave perëndimore, sepse dëshiron të tregojë se edhe veriu i Kosovës është pjesë e territorit të Kosovës. Pikërisht kjo vë në pikëpyetje thirrjet e ambasadorëve perëndimorë për tërheqjen e policisë së Kosovës”.
Më pas ai shton:
“Sidomos përfaqësuesit amerikanë në Ballkan, si ambasadori në Serbi Christopher Hill, kanë muaj që qëndrojnë pas Vuçiqit dhe kanë kritikuar kryeministrin e Kosovës Albin Kurti . Kështu, SHBA-të po braktisin një nga aleatët e saj më të rëndësishëm demokratikë në rajon, ndoshta shtetin më pro-amerikan në botë, Kosovën, dhe po mbështesin regjimin pro-rus të Vuçiçit, i cili sundon në mënyrë autokratike”.
Gazeta austriake bën me dije se “njerëzit në të gjithë Ballkanin janë konfuzë prej muajsh, sepse SHBA-ja ka ndryshuar tërësisht politikën e saj ndaj rajonit. Me sa duket, çështjet e demokracisë dhe sundimit të ligjit nuk janë më të rëndësishme për Uashingtonin. Zyrtarisht thuhet se SHBA-të duan të përpiqen ta çlirojnë Serbinë nga përqafimi rus dhe për këtë e mbështesin Vuçiqin dhe regjimin e tij. Por mesa duket kjo nuk funksionon fare. (…) Politika qetësuese e Perëndimit ndaj Serbisë dhe, në të njëjtën kohë, presioni në rritje ndaj qeverisë së Kosovës – BE-ja madje dëshiron të vendosë masa kundër kabinetit të Kurtit – deri më tani nuk e ka afruar Serbinë me Perëndimin. “Dhe ka nga ata që besojnë se është një përmbysje e plotë e politikës amerikane për diçka tjetër: domethënë – për ndarjen e Kosovës”, shkruan Standard.
“Imazhi i dëmtuar i BE-së”
“Imazhi i Bashkimit Evropian si një ndërmjetës neutral është dëmtuar. Bashkimi Evropian dhe SHBA-të besojnë se përgjegjësia për përshkallëzimin është pothuajse ekskluzivisht e Prishtinës”, tha Prof. Florian Biber nga Universiteti i Gracit.
Sipas Biber, kryeministri i Kosovës, Albin Kurti, qartazi ka bërë gabime strategjike dhe është shumë më pak i gatshëm për kompromis se paraardhësit e tij, por qëndrimi (i SHBA-së dhe BE-së) ndaj Beogradit është shumë jokritik për sa i përket provokimeve.
Kjo pasi, sipas profesorit austriak, ata shpresojnë ta nxjerrin atë vend nga sfera e influencës ruse.
“Perëndimi po i bën presion Kosovës, sepse mendon se mund ta përballojë. Kjo nuk funksionon në Serbi dhe krijon një imazh fatal të njëanshmërisë”, përfundon Biber.
