Këshilli Prokurorial i Kosovës (KPK), i udhëhequr nga Kryesuesi Jetish Maloku, mbajti takimin e radhës nw tw cilin është themeluar Paneli hetimor për rastin disiplinor ndaj një prokurori në Prokurorinë Themelore në Prishtinë dhe janë miratuar Rregullorja për Komisionin Këshillëdhënës për Etikën e Prokurorëve dhe Rregullore për Veprimtarinë, Organizimin e Brendshëm dhe Sistematizimin e Administratës në Këshillin Prokurorial të Kosovës.
Anëtarët e KPK-së, gjithashtu, miratuan Ndryshimin dhe Plotësimin e Udhëzimit Administrativ për Hartimin e Akteve Normative të KPK-së, kurse për takimin e ardhshëm është shtyrë Ndryshimi dhe Plotësimi i Rregullores për Emërimin e Kryeprokurorit të Shtetit dhe kryeprokurorëve të prokurorive të Republikës së Kosovës.
Ndërkaq, lidhur me Kërkesën buxhetore të sistemit prokurorial për vitin 2024 referuar qarkores së parë buxhetore dhe vlerësimeve të hershme 2025 dhe 2026, para anëtarëve të KPK-së ka raportuar Udhëheqësja e Departamentit për Buxhet, Financa dhe Shërbime të Përgjithshme, kërkesë kjo, e cila është aprovuar me rekomandime.
Këshilli Prokurorial mori vendim për të dërguar propozimin tek Presidentja e vendit për t’i liruar nga detyra dy prokurorë me rastin e arritjes së moshës së pensionimit gjatë muajit korrik 2023, kurse në vijim është caktuar Ushtruesja e Detyrës së Drejtorit të Përgjithshëm të Sekretariatit të KPK-së deri në zgjedhjen e drejtorit, por jo më gjatë sesa tre muaj.
Në fund të këtij takimi është mbajtur një seancë disiplinore ndaj një prokurori të Prokurorisë Themelore në Prishtinë, kurse vendimi përkatës do të bëhet publik siç parashihet me ligj. /Kosovatimes/
