Liderët e Bashkimit Evropian do dënojnë incidentet e dhunshme në veri të Kosovës dhe do bëjnë thirrje për de-përshkallëzim të menjëhershëm të situatës bazuar në elementet kyçe të prezantuara nga ana e BE-së.
“Palët duhet të krijojnë kushte për zgjedhje të parakohshme në të katër komunat në veri të Kosovës. Dështimi për të de-përshkallëzuar të tensioneve do të ketë pasoja negative”, thuhet në draftin e konkluzave të cilat liderët do i miratojnë në fund të samiti i cili do mbahet më 29 dhe 30 qershor.
Presidentët dhe kryeministrat e 27 shteteve të Bashkimit Evropian do porosisin gjithashtu se është thelbësore vazhdimi i dialogut dhe zbatimi i të gjitha elementeve të marrëveshjes për rrugën drejt normalizimit të raporteve si dhe aneksit të dakorduar. Kjo sipas draftit të konkluzave përfshinë edhe themelimin e asociacionit të komunave me shumicë serbe në Kosovë.
Samiti i radhës përkon me 20 vjetorin e samitit të Selanikut kur në vitin 2003 u konfirmua se dyert e Bashkimit Evropian janë të hapura për shtetet e Ballkanit Perëndimor. Në këtë rrafsh, pritet qe liderët të përsërisin përkushtimin e tyre të plotë dhe të qartë për perspektivën e anëtarësimit të rajonit në si dhe mbështetjen për përshpejtimin e procesit të anëtarësimit.
