Partia Socialdemokrate ka hapur thirrje për të rinjtë që nuk janë të kënaqur me pushtetin, që të bashkohen.
Kryetari i saj, Dardan Molliqaj, në një konferencë për media ka thënë se pushteti ka shkëputur të gjitha marrëdhëniet shoqërore, e opozita, ka shtuar ai, po i shërben pushtetit.
“Kemi qenë paralajmërues që ky pushtet vetëm sa do ta zymtojë Kosovën dhe do të krijojë ambient të pafavorshëm. Ky pushtet i ka shkëputur të gjitha marrëdhëniet shoqërore. Ajo që na shqetëson tutje janë veprimet e opozitës parlamentare që ne i shohim si shërbim ndaj këtij pushteti”, ka thënë ai.
Molliqaj ka deklaruar se të rinjtë që do t’i bashkohen PSD-së do ta formojnë forumin rinor.
“Gjendjen e shohim kështu: pushtet me elemente autoritare pa opozitë. Ne e kemi nisur një rrugë jemi këtu me disa të rinj që do ta themelojnë forumin rinor të PSD-së. Kjo paraqet thirrje dhe mundësi për të gjithë të rinjtë që nuk janë të kënaqur me pushtetin”.
Molliqaj ka theksuar se synojnë të bëjnë diçka autentike.
“Ne jemi këtu për mos me e përsëritë Vetëvendosjen, jemi këtu për të ndërtuar diçka më autentike”.
