Ka më shumë se tre muaj që pozita më e rëndësishme në Bankën Qendrore të Kosovës, ajo e guvernatorit, ka mbetur me ushtrues detyre. Pas kthimit në pikën zero të konkursit të parë të shpallur për këtë pozitë, Ambasada e Britanisë së Madhe nuk ka pranuar që të monitorojë procesin e rishpallur.
Konkursi i rishpallur për pozitën e të parit të Bankës Qendrore të Kosovës përsëri rrezikon të kthehet në pikën zero.
“Ne kemi qenë të angazhuar në procesin e parë rekrutues për Guvernator të Bankës Qendrore. Ky proces ka dhënë kandidat profesionistë të aftë për ta udhëhequr me pozitën. Sidoqoftë, asnjëri nga kandidatët e rekomanduar nga ekspertët britanikë, zbatues të projektit, nuk është emëruar. Është politikë e jona që mos të angazhohemi në procese të rishpallura të cilat pavarësisht asaj që japin kandidatë të emërueshëm, nuk emërohen vetëm sepse ata kandidatë nuk i pëlqejnë dikujt në vendimmarrje”, thuhet në deklaratën e Ambasadës se Britanisë.
Në lidhje me këtë proces, RTK ka provuar ta marrë një qëndrim edhe nga Kuvendi i Kosovës e Banka Qendrore, por që nga asnjëra prej këtyre institucioneve nuk kanë pranuar të deklarohen.
Ndërkaq, anëtarë të Komisionit Parlamentar për Buxhet nga radhët e opozitës s’e kanë përjashtuar mundësinë që konkursi të dështojë përsëri. Por, nga Lëvizja Vetëvendosje thonë se pozita e të parit të BQK-së do të plotësohet shumë shpejt.
Në konkursin e parë Komisioni Parlamentar për Buxhet kishte identifikuar një sërë shkeljesh, andaj edhe kishte kërkuar që të kthehej në pikën zero.
