Presidentja e Kosovës, Vjosa Osmani, ka dekoruar me Medaljen Presidenciale Ushtarake kolonelin Chris M. Mabis dhe nënkolonelin Jared B. Sheets.
Dy ushtarakët amerikanë e kanë përmbyllur mandatin e tyre në Kosovë, teksa nga e para e shtetit janë nderuar për udhëheqjen dhe përpjekjet e jashtëzakonshme për garantimin e sigurisë, paqes dhe lirisë së lëvizjes për të gjithë qytetarët e Kosovës, gjatë shërbimit të tyre në kuadër të forcave paqeruajtëse të KFOR-it në Kosovë.
Sipas njoftimit për media nga Presidenca, Osmani po ashtu i ka ndarë Mirënjohje Presidenciale edhe togeres Ryann Laky nga Shtabi i Gardës Kombëtare të Indianës, për kontributin e saj në ndërlidhjen dhe bashkëpunimin me policinë e Kosovës si dhe fuqizimin e grave në sektorin e sigurisë.
Pasi që ka falënderuar të tre ushtarakët amerikanë dhe gjithë ushtarët e KFOR-it për angazhimin e tyre për garantimin e sigurisë dhe lirisë së lëvizjes për të gjithë qytetarët e Kosovës, duke rrezikuar edhe jetën e tyre, presidentja Osmani theksoi se lidershipi i tyre ka luajtur rol thelbësor në ruajtjen e paqes dhe stabilitetit në Kosovë dhe rajon në një kohë të ndjeshme.
“Populli i Kosovës është përherë falënderues ndaj kontributit të pazëvendësueshëm dhe të çmuar të Ushtrisë amerikane dhe ushtrive të tjera aleate për paqen dhe stabilitetin. Marrëdhëniet tona me SHBA-të janë ekzistenciale dhe nuk do të ndalemi në angazhimin për forcimin e mëtejmë të marrëdhënieve strategjike në mes të Republikës se Kosovës me Shtetet e Bashkuara te Amerikës”, ka theksuar presidentja Osmani në këtë ceremoni, njofton Presidenca.
Në anën tjetër ushtarakët amerikanë e falënderuan presidenten Osmani për nderimin, duke shfaqur shpresën që paqja dhe stabiliteti do të jenë afatgjate në Kosovë, njësoj sikurse edhe raportet me ShBA-të. /Kosovatimes/
