Njeriu i parë i OKB-së, Antonio Guterres, përmes Misionit të Bosnjë-Hercegovinës, iu përgjigj anëtares së Presidencës së BeH-së, Zheljka Cvijanoviq :
“Kombet e Bashkuara nuk janë nënshkruese të Marrëveshjes së Dejtonit, as OKB-ja nuk është anëtare e PIC, i vetmi organ përkatës për emërimin e Përfaqësuesit të Lartë Ndërkombëtar në Bosnjë dhe Hercegovinë”, thuhet në përgjigje.
Dokumenti është publikuar në rrjetet sociale nga gazetari Ivica Puljić , korrespondent i vjetër i Al Jazeera nga Uashingtoni.
Kujtojmë se regjimi i Dodik e ka konsideruar të paligjshëm për një kohë të gjatë Përfaqësuesin e Lartë Schmidt dhe si justifikim theksojnë se Schmidt nuk është konfirmuar nga Këshilli i Sigurimit i OKB-së.
Anëtarja e Presidencës Zheljka Cvijanoviq i shkroi Sekretarit të Përgjithshëm të OKB-së Guterres dhe e pyeti nëse Schmidt ishte konfirmuar nga ai organizëm ndërkombëtar, në mënyrë që ata të kishin një justifikim shtesë për ta konsideruar atë të paligjshëm, por pasoi një dush i ftohtë nga Nju Jorku.
Kjo hoqi të gjitha dyshimet se Këshilli i Sigurimit duhet të konfirmojë emërimin e Përfaqësuesit të Lartë Ndërkombëtar në Bosnje dhe Hercegovinë, për të cilin Milorad Dodik dhe satelitët e tij kanë zhurmuar prej vitesh. Prandaj, Christian Schmidt u emërua ligjërisht në postin e Përfaqësuesit të Lartë.
