Departamenti i Thesarit i Shteteve të Bashkuara njoftoi më 20 korrik se po vendos sanksione ndaj afro 120 individëve dhe kompanive për mbështetjen e pushtimit rus të Ukrainës.
Ndër të sanksionuarit është edhe kompania serbe MCI Trading DOO, me seli në Beograd.
Në deklaratën e Ministrisë së SHBA-së, thuhet se kjo kompani ka ndihmuar kompaninë ruse AK Microtech për të blerë pajisje të teknologjisë së lartë nga prodhuesit në Azi, Evropë dhe Lindjen e Mesme.
Firma ruse AK Microtech akuzohet se ka ofruar pajisje të teknologjisë së lartë për industrinë ruse të mbrojtjes.
Në njoftimin për shtyp thuhet se firma ruse është e specializuar në transferimin e teknologjisë së huaj tek kompanitë ruse të prodhimit të mikroelektronikës, përfshirë ato që ofrojnë mikroelektronikë për industrinë ruse të mbrojtjes.
Një numër i këtyre përdoruesve janë në listën amerikane të personave dhe subjekteve të bllokuara, thuhet në deklaratë, duke shtuar se AK Microtech përdor ndërmjetës jo-rusë për të fshehur marrësit rusë.
Një nga ndërmjetësuesit e tillë është edhe kompania serbe MCI Trading DOO”, thuhet në njoftim.
Siç thuhet më tej, MCI Trading i ka dërguar dhjetëra dërgesa firmës ruse AK Microtech që nga fillimi i pushtimit rus të Ukrainës në shkurt 2022.
Kompania MCI Trading dhe drejtori i saj Ivan Cvetić ishin në listën e sanksioneve për, siç u tha, ndihmë materiale, sponsorizimi ose ofrimi i mbështetjes financiare, materiale ose teknologjike për kompaninë AK Microtech.
Serbia është një nga vendet e pakta në Evropë që refuzon t’i bashkohet sanksioneve perëndimore kundër Rusisë për pushtimin e saj në Ukrainë.
Më 11 korrik, Departamenti i Thesarit i Shteteve të Bashkuara vendosi në listën e sanksioneve drejtorin e Agjencisë së Sigurisë dhe Informacionit të Serbisë, Aleksandar Vulin, për korrupsion dhe përfshirje në trafikun e drogës, si dhe për lidhjet me Rusinë.
