Që nga mëngjesi i sotëm zjarrfikësit vijojnë të luftojnë zjarret që prej dy javësh flakërojnë në Greqi dhe ku kanë mbetur të vdekur pesë persona, ndërsa parashikohet se erërat e forta që parashikohen për ditën e sotme vetëm sa do të nxisin zjarrin. Qindra zjarrfikës grekë, me përforcime nga vende të tjera, janë vendosur në ishujt Rodos, Korfuz dhe Evia, si dhe në frontin e ri në Greqinë qendrore.
Që nga 13 korriku, rreth 600 zjarre pyjore kanë shpërthyer në vend, shumica e të cilave u shuan me shpejtësi. Dhjetëra mijëra banorë dhe turistë është dashur të evakuohen ditët e fundit, transmeton Beta.
Një zjarr ka rënë herët në mëngjes jo shumë larg shtëpive në periferi të Athinës, por është shuar me shpejtësi. Dy persona kanë humbur jetën nga zjarri që ka rënë dje jo shumë larg zonës industriale të qytetit të Volos, në pjesën qendrore të vendit.
Temperaturat pritet të ulen sot pas valës së të nxehtit, por erërat e forta që nxisin zjarrin mund ta bëjnë më të vështirë shuarjen.
