Përfaqësuesja e Kosovës në basketboll e ka fituar ndeshjen dramatike në udhëtim te Zvicra.
“Dardanët” të shtunën në Fribourg të Zvicrës, fituan ndeshjen e tretë të fazës së tretë të parakualifikimeve për “Eurobasket 2025”, me rezultatin 76:72.
Ndeshja i takoi Grupit H.
Zviceranët kishin krijuar epërsi të cilën e mbajtën deri në minutën e fundit të ndeshjes.
Por mbrojtja e fortë dhe sulmi efikas, bën që Kosova të fitojë dhe të mbajë gjallë shpresat për ta fituar grupin, e për t’i siguruar kualifikimet e rregullta.
Pikët e Muhamedali Janjevës nga gjuajtja e lirë e kaluan në epërsi Kosovën 73:72, kur kishin mbetur edhe 37 sekonda deri në fund të ballafaqimit.
Në aksionin e radhës të Zvicrës, Arian Çollaku e rrëmbeu topin, por pas luftës për ta mbrojtur atë, e nxori jashtë vijave.
Zvicra dështoi të realizonte në aksionin që e pati, ndërsa Drilon Hajrizi bëri kërcim në mbrojtje.
Në aksionin e Kosovës u shkaktua faull, ndërsa Dominic Artis e shënoi vetëm një gjuajtje të lirë për 74:72. Më pas e rrëmbeu topin në aksionin e Zvicrës, e në të u shkaktua faull tjetër.
Artis shënoi dy herë sërish nga gjuajtja e lirë për rezultatin final, 76:72.
Artis ishte më i miri në parket te Kosova me 22 pikë, gjashtë kërcime e katër asistime.
Kontribut dha edhe Drilon Hajrizi me 17 pikë e tetë kërcime, kurse Dardan Berisha realizoi 14 pikë, 4 kërcime e dy asistime.
Yanic Konan Niederhauser te Zvicra pati 14 pikë e gjashtë kërcime, por që nuk mjaftuan për ta shmangur humbjen.
Tri çerekë i fitoi Zvicra, 21:20, 18:15 dhe 22:21. Por në çerekun e fundit, Kosova fitoi 20:11.
Kosova e kishte mposhtur Zvicrën edhe në ndeshjen e parë, 76:49.
Në duelin e dytë pësoi humbje në Danimarkë, 82:75.
Tani finalen e fundit do ta ketë në “Sezai Surroi” në Prizren, më 5 gusht.
E pret Përfaqësuesen e Danimarkës, por i duhet fitorja me më shumë se shtatë pikë.
