Shkruan: Florim ZEQA
Shpresa mbetet tek ngjizja e një alternative të re politike dhe tek vetëdijesimi i qytetarëve, me mos votimin e politikanëve mashtrues si e vetmja mundësi për largimin e kësaj klase të papërgjegjshme nga skena politike.
Parashikimet e sakta politike
Ashtu siç e kam parashikuar vite më parë në shkrimet e mia analitike dhe prononcimet politike për mediat e shkruara dhe elektronike, të gjitha po dalin të vërteta. Këto i vërtetojë kësaj radhe hapja e dyerve të Parlamentit për mërgimtarët që jetojnë në vendet evro-perëndimore, të cilët e bojkotuan në mënyrë masive hyrjen në ndërtesën e Kuvendit të Kosovës dhe të institucioneve të shtetit në përgjithësi, Ky është treguesi më i mirë i vetëdijesimit dhe ndërgjegjësimit të mërgatës sonë pas mashtrimeve serike të politikanëve në pushtet dhe opozitë.
Thënë të vërtetën, institucionet e shtetit nuk e merituan nderimin e mërgimtarëve siç ka ndodhur në të kaluarën kur stërmbushej salla e madhe e Kuvendit me bashkatdhetarë nga të gjitha vendet e botës.
Ky duhet të jetë një sinjal i kuq për pushtetarët dhe për të gjitha partitë politike dhe politikanët në përgjithësi, e në veçanti për deputetët e Kuvendit të Republikës së Kosovës, të cilët nuk janë përfaqësues të partive politike në Kuvend, por përfaqësues të popullit të zgjedhur me votën e lirë të qytetarëve të Kosovës.
Atdhetarët dhe ushtarët e atdheut nuk paguhen nga shteti
Unë nuk kam asgjë personale me asnjë liderë partiak, politikan apo parti politike, nuk e kam asnjë preferencë të veçantë për asnjë subjekt të caktuar politik, por unë e kam një preferencë dhe një dashuri të skajshme për vendin dhe qytetarët e vendit tim, për të cilët jam angazhuar me tërë qenien time për më tepër se katër dekada dhe do të angazhohem pa u ndalur derisa të jem gjallë për të mirën e popullit tim.
Ndjehem tepër krenar, që për katër dekada rresht kam punuar për vendin tim krejtësisht në baza vullnetare pa u paguar nga shteti dhe i tillë do të mbetëm përgjithmonë, ushtarë besnik i atdheut tim. Ushtarët e atdheut nuk paguhen, ata e kryejnë borxhin ndaj atdheut dhe nuk marrin asgjë prej tij, kurse mercenarët paguhen dhe zhvatin krejt çka të munden nga shteti i cili i paguan!
