Zgjedhjet e reja në katër komuna me shumicë serbe në veri të Kosovës, sipas njohësve të rrethanave, janë zgjidhje e mundshme për krizën aktuale, por që ato të shpallen duhet të ketë vullnet nga të dyja palët. Kështu kanë theksuar për RTK 2, analistët politikë Milazim Krasniqi dhe Ognjen Gogiq.
Krasniqi beson se nëse nuk mbahen zgjedhje të reja, situata në veri të Kosovës mund të përkeqësohet.
“Zgjedhjet në veri duhet të mbahen në bazë të tri pikave të Bashkimit Evropian. Duhet që sa më shpejt të shpërkallëzohet situata dhe më pas të fillojë procesi i organizimit të zgjedhjeve. Nëse kjo nuk ndodh, atëherë me shumë mundësi do të bie qeveria, sepse është e pamundur që kjo situatë të zgjasë, për shkak se gjithmonë mund të përkeqësohet”, tha Krasniqi.
Ndërkaq, sipas politologut Ognjen Gogiq, Ligji për Vetëqeverisjen Lokale pjesërisht jep bazë për shpalljen e zgjedhjeve të reja në këto komuna, e që do të ishin zgjidhje e krizës në veri të Kosovës.
“Deri te zgjedhjet e reja në komunat në veri të Kosovës mund të vije vetëm përmes marrëveshjes ndërmjet palës serbe dhe shqiptare se zgjedhjet e reja të paraqesin zgjidhje të kësaj krize që po vazhdon prej disa muajsh në veri të Kosovës. Nëse do të kishte vullnet për zgjedhje të reja, atëherë do të gjendej edhe mënyra për t’i shpallur ato, por kjo pyetje do mund të zgjidhet vetëm kur të përcaktohet nëse zgjedhjet përfaqësojnë një rrugëdalje nga kriza për të dyja palët”, tha Gogiq.
Sipas Ligjit për Vetëqeverisjen Lokale në Kosovë, zgjedhjet e jashtëzakonshme mund të mbahen nëse kryetari aktual jep dorëheqje, në rast se qytetarët kërkojnë shkarkimin e kryetarit të komunës përmes një peticioni të nënshkruar nga 20 për qind e votuesve të një komune. si dhe në rast se kryetari i komunës, pa arsye, nuk paraqitet për një muaj në vendin e punës.
