Me gjithë thirrjet që dhuna në familje të trajtohet me prioritet nga të gjitha institucionet dhe thirrjes për ndalim të këtyre rasteve, shifrat po rriten.
Në 6 muajt e parë të këtij viti janë shënuar 1272 raste të dhunës në familje, 100 raste më shumë se në 6 mujorin e parë të vitit të kaluar. Numri më i madh i këtyre rasteve janë gra.
Në Ministrinë e Drejtësisë janë të vetëdijshëm se ky numër është më i madh. Shumë gra në Kosovë jetojnë duke përjetuar dhunë sistematike dhe nuk e raportojnë atë.
“Besojmë që shumë më shumë ndodhë dhuna, por vitet e fundit është rritur vetëdija për raportim të rasteve të dhunës në familje. Për ne është shqetësues numri i madh i rasteve të raportuara”, tha për RTK-në, Nazlie Bala, këshilltare e ministres së Drejtësisë, Albulena Haxhiu.
Për shoqërinë civile dënimet e vogla dhe tendenca për fajësimin e viktimës mbeten shqetësimi kryesor.
“Ekziston tendenca e minimizimit të dhunës dhe fajësimit të viktimës, dhe në këtë mënyrë ato dekurajohen për të vazhduar me zhvillimin e rastit dhe përfundimin me një vendim gjyqësor, pasi dënimet janë shumë të vogla”, tha Adelina Berisha nga Rrjeti i Grave.
Me dënimet e vogla nuk pajtohet as këshilltarja e ministres Albulena Haxhiu, megjithëse thotë se ky është vendim i gjyqësorit.
“Dënimet janë të ulëta, por këto janë procedura që bien në domenin e gjykatës, sepse dënimi është fjala ë fundit e gjyqësorit. Natyrisht që nuk pajtohemi me ketë shkallë të ulët të dënimeve”, tha Bala.
Autoritetet në vend shqiptojnë gjoba të ndryshme për dhunë në familje, përfshirë burgimin me kusht, me gjobë, apo dënime efektive. Në 5 vitet e fundit në organet e rendit janë regjistruar 8,688 viktima të dhunës në familje.
