Policia e Kosovës ka dhënë detaje lidhur me rastin e ndodhur të premten pak para mesnatës në kryeqytet.
Zëdhënësi i policisë rajonale të Prishtinës, Agron Borovci ka thënë se reth orës 23:30, është raportuar për të shtëna me armë zjarri në një lokal në rrugën “Rexhep Luci” në Prishtinë.
“Policia menjëherë ka dalë në vendin e ngjarjes dhe nga informacionet e para dyshohet se disa persona kanë marrë plagë nga arma e zjarrit apo edhe nga fragmente qelqi. Ndërkohë që të lënduarit janë dërguar për trajtimin e nevojshëm mjekësor, policia po vijon punën me veprime të ekzaminimit të vendngjarjes si dhe me veprime të tjera operativo-hetimore”, ka thënë Borovci.
Ai tutje ka thënë se aktualisht së paku dy të dyshuar janë identifikuar si të implikuar në rast, përderisa po punohet edhe për identifikimin e të dyshuarve të tjerë të mundshëm.
Gjuajtje me armë në një lokal në Prishtinë, dyshohet për disa të plagosur
Kryeqyteti është tronditur të premten pak para mesnatës nga të shtënat me armë në njërën prej kafiterive të njohura në qendër, ku dyshohet për disa të plagosur.
Raportohet se disa ambulanca ndodhen në vendngjarje, teksa hetuesit policorë janë duke e hetuar rastin. Deri më tash nga Policia e Kosovës nuk ka dhënë detaje nga kjo ngjarje e rëndë.
