Kosova ditëve të fundit është përballur me vrasje, plagosje por edhe krime të tjera të natyrave të ndryshme. Siguria publike përveç tjerash, kërcënohet edhe nga armët pa leje. Vetëm në periudhën janar-korrik, Policia e Kosovës ka konfiskuar 636 armë pa leje, ndërkohë që janë raportuar 14 vrasje. Njohës të sigurisë vlerësojnë se numri i armëve ilegale në duart e qytetarëve është mbi 250 mijë.
Ditëve të fundit, Kosova është përballur me vrasje nga motive të ndryshme, të cilat edhe kanë cenuar sigurinë publike. Vetëm brenda kësaj jave, janë shënuar 3 vdekje nga armët e zjarrit. Zyra për Informim e Policisë së Kosovës, në një përgjigje elektronike për Radio Kosovën, thekson se në periudhën janar-korrik, kanë konfiskuar 636 armë dhe mbi 9 mijë municion të kalibrave të ndryshëm. Në këtë periudhë, të dhënat e Policisë theksojnë se janë raportuar 14 vrasje, 7 prej tyre, vrasje te rënda.
Njohës të sigurisë vlerësojnë se janë mbi 250 mijë armë ilegale në duart e qytetarëve. Duke folur për Radio Kosovën, eksperti i sigurisë, Drizan Shala, thotë se fushatat e Policisë së Kosovës për legalizimin e armëve, kanë treguar efekt negativ.
“Pra armë ilegale që kanë mbetur si rezultat i luftërave të viteve 90-ta, dhe Policia e Kosovës dhe MPB gjatë këtyre viteve ka pasur disa kampanja të caktuara për t’i nxitur qytetarët që t’i dorëzojnë, legalizojnë dhe më pastaj të kemi një kontroll më të rreptë të armëve ilegale. Këto kampanja zakonisht kanë shërbyer vetëm për konsum politik dhe kanë shpenzuar mijëra euro vetëm për ta dëmtuar buxhetin, por efekti ka qenë vetëm negativ”, tha Shala për Radio Kosovën.
Fenomeni i armëve ilegale në shtëpi, është e vështirë të kontrollohet, thotë për Radio Kosovën Mentor Vrajolli nga Qendra Kosovare për Studime të Sigurisë.
“Qytetarët mbajnë armë ilegale në shtëpi dhe është jashtëzakonisht vështirë të ndalohen të gjitha incidentet. Ajo çka mund të bëjnë institucionet është se duhet të kujdesen që personat që kanë precedentë penalë të ballafaqohen me drejtësinë në instancë të parë dhe të mos e krijojnë ndjenjën e të qenit më të fortë sesa ligji apo të paprekshëm nga ligji. Kështu që kjo mbase do ta ulte rrezikun për krime dhe duhet të jemi realistë se krimet ndodhin përtej fuqisë së institucioneve”, tha ai.
Sidoqoftë, ekspertë të sigurisë vlerësojnë se departamenti për siguri publike të ketë numër më të madh për të monitoruar, pika statike të kontrollit, bastisje e bashkërendim të institucioneve publiko-private për të minimizuar e kontrolluar, rendin dhe sigurinë publike në vend.
