Ministri i Mbrojtjes, Ejup Maqedonci, tha se gjatë këtij mandat do jetë i përkushtuar në arritjen e katër objektivave kyçe, që kryesisht ndërlidhen me Ministrinë e Mbrojtjes dhe Forcën e Sigurisë së Kosovës.
Në konferencën e parë të tij për medie, Maqedonci në dy objektivat e para përmendi rëndësinë e zgjerimit të bashkëpunimit bilateral ndërmjet këtyre dy institucioneve, e në veçanti me Shtetet e Bashkuara të Amerikës.
“Është shumë e rëndësishme që gjatë këtij gjysmë mandati që do ta drejtojë Ministrinë e Mbrojtjes, do të jem i përkushtuar që të vazhdoj arritjen e katër objektivave kyçe, dy që kryesisht lidhen me Ministrinë e Mbrojtjes dhe dy që lidhen me Forcën e Sigurisë së Kosovës. Dy të parat do të jenë fuqizimi i mbikëqyrjes demokratike, do përkushtohemi në vazhdimësi që të bëjmë fuqizimin e mbikëqyrjes demokratike, normalisht duke implementuar politikat e mbrojtjes së Qeverisë së Kosovës. E dyta do të jetë zgjerimi i bashkëpunimit bilateral, duke bërë kështu që Ministria e Mbrojtjes dhe FSK të rrisin bashkëpunimin në aspektin strategjik me partnerët dhe aleatët tanë, në veçanti me Shtetet e Bashkuara të Amerikës”, deklaroi Maqedonci para mediave.
Ndërkaq, sa i përket dy pikave tjera që ndërlidhen me FSK-në, Maqedonci i vuri theks zhvillimit të kapaciteteve ushtarake dhe ruajtjen e kapaciteteve aktuale.
“Dy objektivat tjera që lidhen me zhvillimin e Forcës së Sigurisë së Kosovës, janë dy, pra zhvillimi i kapaciteteve ushtarake, kryesisht ato që lidhen me këmbësorinë. Kapacitetet e reja do të ndërtohen në përputhje me standardet e NATO-s e në bashkëpunim me aleatët. Objektivi tjetër ka të bëjë me forcën, është ruajtja e kapaciteteve aktuale”, theksoi tutje Ministri i Mbrojtjes.
Derisa më tej, Maqedonci tha se në vazhdimësi do të ketë qasje bashkëpunuese me të gjithë qytetarët e Kosovës.
Kujtojmë se Ejup Maqedonci është emëruar ministër i ri i Mbrojtjes në Kosovë, pas dorëheqjes së ministrit, Armend Mehaj.
