Ministri i Financave, Hekuran Murati ka thënë se zbatimi i vendimit të faljes së tatimit në pronë deri në 100 euro mbetet përgjegjësi e komunave, nëse ata duan ta shfrytëzojnë atë në mënyrë që t’ua lehtësojnë qytetarëve këtë barrë financiare.
“Një mundësi të tillë për të lehtësuar barrën e tatimpaguesve e patën kërkuar pothuajse të gjitha komunat. Tani, u takon komunave të vendosin nëse duan ta shfrytëzojnë këtë mundësi ose jo”, ka shkruar Murati në Facebook.
Tutje ai ka përmendur se Graçanica, Obiliqi dhe Drenasi kanë zbatuar këtë vendim, i cili është miratuar në Kuvend.
“Deri në fund të muajit gusht 2023, nga tatimi në pronë komunat kanë mbledhur mbi 35 milionë euro, që e tejkalon me rreth 500 mijë euro nivelin e mbledhur për komplet vitin 2022”, ka shkruar tutje Murati.
Kreu i financave në vend ka thënë se më 15 shtator përfundon afati ligjor për faljen e tatimit në pronë.
