Socialistët mbledhin Asamblenë pasditen e 4 shtatorit, të dytën brenda një harku kohor në më pak se 6 javë.
Kryeministri Edi Rama ka vendosur të mbajë një tjetër takim me anëtarët e Asamblesë Kombëtare të partisë që drejton, ku interesi mbetet në fokusin nëse do të riformatojë kabinetin qeveritar.
Burime zyrtare nga selia rozë, konfirmojnë për RTSh-në, se nuk ka një rend me pika të paracaktuara, por deri tani është parashikuar fjala e kryetarit Rama dhe caktimi i një date të mundshme për mbajtjen e Kongresit.
Asambleja e 4 shtatorit, pritet me interes, për faktin se kryeministri Edi Rama, në komunikimet me median, ka lënë të hapur mundësinë e ndryshimeve në kabinetin qeveritar.
Ai njihet për vizionin e tij fleksibël, dhe ndryshimet ministrore janë një formë që ka rezultuar produktive, sa i takon vizionit qeverisës, kur të majtët janë në mandatin e 3-të.
Në 2018-ën, Edi Rama ndryshoi pothuajse më shumë se 1/3 e kabinetit, me synimin e impulseve të reja në qeverisje. Socialistët, e kanë të mirë organizuar jetën brenda partisë. Kjo e fundit do të përfshihet së afërmi edhe në zgjedhjen e strukturave drejtuese.
