Presidentja e vendit, Vjosa Osmani, ka bërë të ditur se në takimet që ka zhvilluar në selinë e NATO-s në Bruksel, ka diskutuar edhe për sfidat në veri të Kosovës.
Në llogarinë e saj në Facebook, ajo ka shpërndarë një video nga selia e NATO-s, ku ndër të tjera thotë se Kosova duhet të punojë bashkë me aleatët e saj në mënyrë që t’i zgjidhë këto sfida të sigurisë.
“Natyrisht që shumë nga sfidat me të cilat ballafaqohemi, në veçanti në veri të vendit për shkak të grupeve të organizuara kriminale serbe, i diskutuam sot – duhet të punojmë bashkë me partnerët dhe aleatët tanë në mënyrë që t’i zgjidhim të gjitha këto sfida të sigurisë sepse çështja e sigurisë asnjëherë nuk është individuale, është gjithnjë kolektive”, ka thënë Osmani.
Tutje, ajo ka shtuar se gjatë këtyre 25 vjetëve, Kosova e ka dëshmuar që është partnere e NATO-s dhe do të vazhdojë ta dëshmojë këtë edhe më tutje.
