Prokurorët suedezë kërkuan të enjten një dënim me burg deri në pesë vjet për shtetasin ruso-suedez Sergei Skvortsov, i akuzuar për transferimin e teknologjisë perëndimore në ushtrinë ruse. Sergei Skvortsov, i arrestuar në nëntor 2022 gjatë një kontrolli në shtëpinë e tij në periferi të Stokholmit, ka jetuar në Suedi që nga vitet 1990 dhe drejton kompani import-eksporti, raporton Zëri i Amerikës, duke cituar AFP. Shtetasi rus 60 – vjeçar akuzohet për “veprimtari të paligjshme të inteligjencës” kundër Shteteve të Bashkuara dhe Suedisë për më shumë se një dekadë deri në arrestimin e tij.
Sipas ekspertëve të cituar nga media suedeze, bëhej fjalë kryesisht për pajisje elektronike që mund të përdoreshin, veçanërisht, në kërkimet për krijimin e armëve bërthamore.
Pjesa më e madhe e gjyqit tre-javor u zhvillua me dyer të mbyllura për arsye të sigurisë kombëtare, vëren gazeta Le Monde.
“Ai është një agjent prokurimi për kompleksin ushtarak rus dhe njësinë e tij të inteligjencës, GRU,” tha prokurori Henrik Olin, duke folur në gjykatën e qarkut të Stokholmit. “Rusia ka nevojë për teknologji elektronike.” Olin tha se Skvortsov përdorte emra fiktive të partnerët e biznesit, nuk
treguan informacione për llojet e produkteve të eksportuara dhe dhanë informacione të rreme për konsumatorët e tyre përfundimtarë.
Skvortsov në një seancë gjyqësore të enjten u shpreh se ai ishte i pafajshëm.
Olin i kërkoi gjykatës të shqiptonte një dënim nga katër e gjysmë deri në pesë vjet.
Fajësimi i Suedisë për “aktivitete të paligjshme të inteligjencës” është një hap më i ulët se spiunazhi.
Olin i tha më parë AFP se pajisjet elektronike ishin kryesisht me burim nga Shtetet e Bashkuara.
Gjatë gjyqit në Stokholm, një punonjës i FBI-së, si dhe përfaqësues të shërbimeve inteligjente suedeze, dëshmuan me dyer të mbyllura.
