Drejtori i Klinikës së Kardiologjisë, QKUK, Lulzim Kamberi, kardiolog ka reaguar ndaj punëtorëve shëndetësorë të Kardiologjisë, të cilët kanë protestuar të premten, për të shprehur pakënaqësi në lidhje me menaxhmentin e kësaj klinike.
Drejtori, Dr.sci.Dr.Lulzim Kamberi ka reaguar, si thotë ai, ndaj “pretendimeve të shprehura në protestën e mbajtur nga një grup i mjekëve të Klinikës së Kardiologjisë, datë 29.09.2023”.
“Të nderuar, ndiej për obligim t’ju jap disa sqarime lidhur me protestën e një grupi të mjekëve të Klinikës së Kardiologjisë të QKUK të datës 29.09.2023 Klinika e Kardiologjisë në vazhdimësi është përcjellur me vështirësi të natyrave të ndryshme”, sqaron drejtori Kamberi.
Sipas, Dr. Kamberit shërbimi i Kardiologjisë invasive dy herë është ndarë nga Klinika e Kardiologjisë, ndarje e përcjellë edhe me ndërrim statuti, dhe së fundmi, pas ndërrimit të statutit në mars të vitit të kaluar është bashkuar përsëri. Vetë ndarjet dhe bashkimet tregojnë për vështirësitë e shumta të kësaj Klinike.
Dr. Kamberi në reagimin e tij ndaj protestës së djeshme ka përshkruar punën e tij ndër vite.
“Unë asnjëherë nuk udhëhiqem me inate, hakmarrje, pengesa të kuadrove të reja, përkundrazi në vazhdimësi veproj për ngritje të cilësisë në punë, respektimit të rregullave në punë, respektimin e të gjithë të punësuarve në institucionin që unë aktualisht e drejtoj, si parakusht për detyrën tonë të shenjtë të ruajtjes së shëndetit të të sëmurit”, shkruan tutje ai.
Drejtori tutje flet edhe për planet e tij dhe hapat që do të ndërmerr në menaxhimin e Klinikës së Kardiologjisë.
Punëtorët shëndetësorë të Kardiologjisë kanë protestuar dje për të shprehur pakënaqësi në lidhje me menaxhmentin e kësaj klinike.
Aurora Bakalli nga Këshilli Organizativ i protestës tha se duke mos parë rrugë tjetër për t’i zgjidhur pakënaqësitë në Klinikën e Kardiologjisë, kanë qenë të shtyrë që të fillojnë me hapa sindikal, në këtë rast me protestë një-orëshe.
