Në margjinat e samitit të liderëve të vendeve evropiane që po mbahet në Granada të Spanjës, presidentja e Kosovës, Vjosa Osmani ka takuar kryeministrin e Kroacisë, Andrej Plenkoviq me të cilin kanë diskutuar për zhvillimet e fundit në rajon, me theks të veçantë për agresionin e Serisë ndaj Kosovës.
“Së bashku me kryeministrin e Kroacisë Andrej Plenkoviq kemi diskutuar zhvillimet e fundit të sigurisë në Kosovë. Unë e informova atë për provat mbi aktin agresiv të Serbisë. Ne e vlerësojmë mbështetjen e qëndrueshme të Kroacisë për vendin tonë dhe për paqen dhe prosperitetin në të gjithë rajonin”, deklaroi Osmani në platformën X.
Presidentja e Kosovës, po merr pjesë në Samitin e Tretë të Komunitetit Politik Evropian, ku marrin pjesë liderët e 47 vendeve evropiane. Ajo në një prononcim për mediet e pranishme atje në fillim të samitit, ka thënë se gjatë këtij samiti do të kërkojë nga liderët evropianë që të sanksionojnë Serbinë për agresionin e kryer ndaj Kosovës.
E pyetur nëse mund të ndodhë një takim ndërmjet saj dhe presidentit serb, Aleksandër Vuçiq në Granada, ajo ka thënë se nuk është paraparë diçka e tillë dhe nuk ka arsye për t’u takuar para se të vendosen sanksione kundër Vuçiqit.
