Rusia po kërkon rizgjedhjen në Këshillin e Kombeve të Bashkuara për të Drejtat e Njeriut javën e ardhshme në atë që shihet si një test kyç i përpjekjeve perëndimore për ta mbajtur Moskën të izoluar diplomatikisht mbi pushtimin e saj të Ukrainës në shkurt të vitit 2022, raporton Reuters.
Mes shenjave të “lodhjes” së luftës në Ukrainë, disa diplomatë thonë se Rusia ka një shans të arsyeshëm për t’u ripranuar në Këshillin e OKB-së për të Drejtat e Njeriut në një votim të fshehtë të martën, 18 muaj pasi u përjashtua nga një fushatë e udhëhequr nga SHBA.
“Mendoj se ka lodhje nga Ukraina. Dhe së dyti, shumë njerëz nuk duan që organet e OKB-së të dominohen nga zërat perëndimor, për të mos përmendur pikëpamjet hegjemonike”, tha për Reuters një diplomat i lartë aziatik, i cili foli në kushte anonimiteti.
Kritikët e Rusisë thonë se rizgjedhja e saj ndërkohë që lufta gati 20-mujore në Ukrainë vazhdon të jetë e pandërprerë, do të shkatërronte besueshmërinë e këshillit me bazë në Gjenevë, një nga organet më efektive të OKB-së.
Moska po mbledh në mënyrë aktive votat e vendeve afrikane, aziatike dhe të tjera joperëndimore në Asamblenë e Përgjithshme të OKB-së prej 193 anëtarësh, duke sulmuar atë që e sheh si hipokrizi dhe njëanshmëri të padrejtë të Shteteve të Bashkuara dhe aleatëve të saj.
“Këshilli i të Drejtave të Njeriut duhet të mbrohet nga keqpërdorimi si një mjet për zgjidhjen e llogarive politike dhe nga praktika e standardeve të dyfishta,” tha të enjten Vasiliy Nebenzja, ambasadori i Rusisë në Kombet e Bashkuara. “Këto janë taktikat e disa vendeve… të cilat e shpallin veten si mbështetës të të drejtave të njeriut,” tha ai në pritjen diplomatike të misionit rus në OKB në Nju Jork.
Rusia po lufton Bullgarinë dhe Shqipërinë për dy vendet e Europës Lindore. Secilit prej kandidatëve të suksesshëm i duhet një shumicë – të paktën 97 vota – për të fituar mandatin trevjeçar që fillon më 1 janar.
Edhe pse vende me status ligjor të dyshimtë janë zgjedhur në të kaluarën, vëzhguesit thonë se kurrë në historinë 17-vjeçare të Këshillit nuk i është dhënë e drejta e votës një vendi kaq të akuzuar për krime të egra si Rusia. “Do të ishte padyshim katastrofike për besueshmërinë e Këshillit, por edhe për besueshmërinë e OKB-së në sytë e njerëzve – veçanërisht viktimave – në mbarë botën”, tha Marc Limon, drejtor ekzekutiv i Universal Rights Group.
Marsin e kaluar, këshilli hapi një hetim mbi luftën në Ukrainë dhe akuzoi forcat ruse për shkelje që mund të përbëjnë krime kundër njerëzimit. Ai caktoi gjithashtu një hetues për të ekzaminuar provat e shkeljeve të të drejtave të njeriut në Rusi.
Ndryshe nga Këshilli i Sigurimit i OKB-së në Nju Jork, ku Rusia është një nga pesë anëtarët e përhershëm me të drejtë vetoje, asnjë nga 47 anëtarët e Këshillit të të Drejtave të Njeriut nuk ka të drejtën e vetos.
